Tuesday, June 26, 2007

commentat 2

Sunday, March 25, 2007

commentat 2


معلش الموضوع دلوقتي عن الكومنتات برضه بس من منظور مختلف..انا عايز اعترف بحاجه يمكن انا مبلوجتش من زمان عشان خفت الناس متشاركنيش و اللا طب ما اقعد و اكلم نفسي ولا اوشوش الحيطان..الموضوع ده عن تأثير الكومنت في حياة المدون و حالته المزاجيه..يعني انت يا أستاذ.. ة انت يا انسه..يا مدااااام....يا بيييييه...يا عالم مدوناتيه..هسأللكم سؤال..الكومنت بيفرق معاك؟؟...

طبعا هلاقي ناس هتقول لا طبعا ميفرقش معايا...و دول اعتقد نوع من تلاته..يا اما ماشاء الله من اثرياء البلوجر و التوبيك بيجي عليه 100 كومنت اللهم لا حسد يعني..: )..مبئرّش لا سمح الله بس خلاص يعني من كترهم مبيبقاش فرحان بيهم زي ما كان زمان اول ما فتح المدونه...وممكن كمان ناس تقول لا مبتفرقش معايا و البلوج مش بكمنتاته و انا بكتب لنفسي بفضي اللي جوايا و خلاص مش عايز كمنتات من حد..وممكن حد تاني يكون فعلا عايز كمنتات بس بيكابر يعني عشان متصعبش عليه نفسه..اهيئ اهيئ...و النعمه هدمّع..اههههه ياني يا كومنتي


واكيد هيكون في ناس بتقول اه طبعا كومنتي حبيبي كومنتي الاكبر..يوم ورا يوم امجاده بتكبر... وده يا اما برضه من

اثرياء البلوجر كثيري الكومنت بس البحر يحب الزياده..يا اما يكون حد حديث التدوين زيي..يا اما يكون حد نفسه في كومنت و مش بيكابر و ده مش عييب..

انا هنا عايز اقول حاجه...ليا اعتراض على اخويا و حبيبي جروم انه لا بقى...لا و الف لا...عمر العداد بتاع البلوج

ما بيبسط لو الواحد لقى العداد 10000 و هو جايله كومنتين..ده الواحد بتصعب عليه نفسه..اه و النبي :'(..قصدي اكيد طبعا لانه بكل بساطه هيقول لااااا كل دول دخلوا و مفيش حاجه عجبتهم لدرجة انهم يسيبوا كومنت..عشان طبعا زي ما احنا عارفين الكومنت ب ايه؟؟..ببلاش و مبيغلاش..ده بيشيل العداد و بيبقى كده مبسوط اكتر عشان بيصّبر نفسه مهو مش عارف بقى في حد بيدخل عنده ولا لا فبيقنع نفسه ان محدش بيجي فمبيزعلش اوي لما يدخل ميلقيش كومنتات

كمان حاجه مش منطقي ولا طبيعي انك يا بلوجر و يا بلوجرايه تكون مبيجلكش كومنت و ميكنش ده حازز في نفسك..اصل انت ايه؟...يا اما عندك مشكله و قايلها على مدونتك و اكيد كلام الناس هيفرق معاك حتى لو قالولك اتفلق و اللا مكنتش كتبتها ما الواحد مش هتفرق معاه كان كتبها في ورقه و خلاص مكنش عرضها على الناس...او يا اما انت موهوب او موهوم..اهيئ لهيئ...و عندك بوئين شعر ولا قصه و مش هاين عليك تحرم الناس منها ف بالتالي بتنزلها على المدونه و بيبقى نفسك تشوف رد فعلهم زي ما تكون ممثل واقف على المسرح..و بدليل ان الواحد بينبسط اوي لمّا حد يبعت يقوله تعديل او بيت عجبه اوي او او او عشان بيحس ان الشعر ده اثر فيه لدرجة انه سابله كومنت و في اللحظه ديه بينسى ان الكومنت ببلاش :) و بيحس قد ايه الشخص ده عانى عشان يسبله كومنت...يمكن تكون كاتب موضوعه للنقاش و عايز تعرف رأي الناس فيه...و ساعتها لما متلقيش كومنتات هتحس ايه ده..هو الموضوع هايف اوي كده..معقوله محدش شاركني..يا اما هتكون بلوجر ساخر زي كاريكاتنوز او البتاع او او او و هتنبسط اوي لما تحس من الكومنت ان اللي بعتلك ده ضحك بجد

محدش يكابر يا جماعه الكلام على النت زي الكلام مع الناس وشك في وشهم..انت لو اتكلمت و حكيت وصحبك مردش او خسيت انك بتكلم نفسك.هتبقى مبسوط؟!!....
صدقوني مفيش اجمل من ان الواحد يصحي الصبح و لسه عينيه معمّصه و يلاقي حد سايبله كومنت علي البلوج احساس كده غريب منعني حتى من اني اخلي الكومنتات محتاجه موافقه او حتى يتبعتلي على المايل انني جالي كومنت..احساس كده زي القمار مع اني و الله ملعبتوش كده تفتح البلوج..هوووووبببببببااااااااا جووون..قصدي كومنت..او لا ايه ده مفيش طب خلاص اقفل و افتح كمان نص ساعه..اهو قمار كده...ببلاش.

.ولا انتوا ايه رأيكوا؟؟؟

Posted by ert3ashat at 2:00 PM 27 comments

Labels: شؤون بلوجريه

No comments: