زمن السبع أبواب...

Wednesday, April 4, 2007

زمن السبع أبواب...

ليه كده يا زمن...

ليه..بس ليه؟!!!..

ليه من الأحلام تاخدني...

وعمري جنيت عليه...

**

كان قدامي سبع ببان...

قلتلي..

خش من ده باب..

هتلاقي وراه أحباب...

صدقتك و رحت...

بس كل اللي لقيتهم كلاب..

سعرانه وجعانه..

راضعين من الخيانه...

و لغدرهم أصحاب...

لحقت نفسي و خرجت

*

قلتلي..خش تاني باب...

هتلاقي بساتين جميله..

مليانه ورود و أعشاب..

بس اللي لقيته بيوت قديمه..

مهجوره..مهدومه...

ب أشبحها مسكونه..

و مغطيها الهباب...

لحقت نفسي و خرجت..

*

ابتسمت بخبث و قلت...

ادخل من تالت باب...

هتلاقي وراه الشباب..

بس ملقتش غير العجز..

المرض و التعب..

في قلوب ماتت..

وعيون بيشعوا عذاب...

لحقت نفسي و خرجت...

*

قلتلي خش رابع باب..

هتلاقي وراه من المرجان شعاب..

بس ملقتش غير أحجار..

تقيله و كبيره ..

بس في كبرها رخيصه..

و لا ليها في السوق حساب...

لحقت نفسي و خرجت...

*

ضحكت بشرّ و قلت..

ادخل من خامس باب..

هتلاقي وراه العاب..

بس كل اللي لقيته سدود..

عاليه و عريضه..

غريبه و عجيبه...

فكّرتني ب اللي شفته من صعاب..

لحقت نفسي و خرجت..

*

قلتلي خش سادس باب..

و خد البساط و طير فوق السحاب..

وقفت عليه..و اتاريه تحتيه..

بير غويط..وقعت فيه..

و دفنّي تحت التراب...

*

و خرجت لقيتك..

بتقلّي..سيبك من ده باب..

قدامك اهو..سابع باب..

قلتلك سيبك منّي..كفيااك..

ده انا بنارك انكويت..

ومن غدرك استويت..

كل ابوابك عذاب..

مداري وشه ب هباب..

انا زهقت و تعبت..

انت فعلا...

زمن ملكش أصحاب...

**************

Posted by ert3ashat at 3:54 PM 24 comments