Sunday, April 1, 2007
يا كابتن......لا مؤاخذه...بلوجك شفاف!!
اولا يا جماعه بجد عايز اشكر كل الناس اللي وقفوا معايا و بعتولي كومنتات شاركوني بالرأي و النصيحه و الله العظيم الواحد ندمان انه مبقاش بلوجر من زمان…ندمان على كل لحظه في عمري عدت من غير ما أبلوج فيها معاكوا..:)
****
ثانيا يا جماعه انا لا مخطط و لا كاروهات…انا كان كل قصدي اني اخلي مرّه توبيك كلام و نقاش نتكلم فيه مع بعض و
مرّه يكون شعر…عشان كده يكون في تواصل بيننا ب استمرار خصوصا زي ما قلنا قبل كده انه لو بلوج أدبي مش هيكون عليه اقبال…و انتم زي ما لاحظتوا موضوع الكومنتات ده موضوع حساس و شائك للغايه عندي..اه و النعمه:'(…يعني بصراحه انا لو حسيت ان مفيش كومنتات هحس ان بلوجي واقع قدام الناس او من غير بلوج اصلا و ديه حاجه اكيد ما ترضوهاش لأخوكم ارتعاشه…
****
ثالثا..انا عملت زي ما هدى ما قالتلي و كتبت..وكتبت بس مش هنشر دلوقتي…كفايه كأبه….انتم مش ناقصين…فهبقى انشرهم بعد كده ان شاء الله
****
رابعا انا هخرج من الموود الكئيب ده عشانكم يا عيني الناس مش ناقصه و عشاني انا كمان
****
خامسا بقى…و ده موضوع اليوم….طلعوا ورقه و اكتبوا المق...…قصدي الموضوع هو شكلك باين على بلوجك…او بلوجك سايح على وشك..او بالمفتشر كده بلوجك شفاف؟.
انا سمعت و العهده على الراوي ان الأخوه المدوناتيه..و الأخوات كمان بينظموا رحلات ترفيهيه لجنينة الحيوان و الأورمان و ساقية الصاوي و ساقية مكي و ساقيه محمد عبد التواب كوباية ميه ساقعه…:)...ولو مش كده كدبوني بس لو كده صارحوني..:(...انا مش هزعل...مش هنقهر و لا هحس اني مش مدون و ماليش بلوج يتعزم زي الخلق...:(....المهم...ولو مكنتش بتروح حتى القعدات الجامده ديه...طب ما في مدونين مع مرور الزمن بيحطوا صورهم.....
السؤال هنا..هل يا جماعه و كل واحد فينا بيقرا لحد معين و متابع لبلوجه بيرسمله شكل في خياله...شكل بملامح و ايدين و رجلين...ولا مجرد بلوج اخضر و ب استك من فوق..ولا اصلا مبيرسمش...
طب هل يا جماعه مثلا لما حد راح القعدات ديه او اتعرف على مدون كان متابعه او شاف صورته...هل فعلا شكله كان باين من بلوجه..او يعني..بلوجه شفاف...هل الواحد فعلا ممكن يحدد شكل حد من كتاباته..ولو ملامح عامه حتى...
انا عن نفسي حاسس انها حاجه صعبه جدا....يمكن اقرب للمستحيل...اكيد في حالات كده ولو حد فيكو صادفها يا ريت يشاركنا بيها بجد ...
طب يا جماعه دلوقتي لو انا متخيل حد بشكل معين و متابع كتاباته و رحت مرّّه قابلته وشفته و طلع شكله مختلف تماما عن الشكل اللي انا كنت متوقعه..كنت فاكره ابيض طلع احمر.....هل ده هيفرق في متابعتي ليه؟..على فكره انا بسأل بجد لا لمخاوف شخصيه والله العظيم..دنا حتى ...ولا بلاش عشان الحسد..:)....
طب بقى و ديه اخر حاجه في دماغي دلوقتي هل انا اقدر اكون ملامح الشخصيه من البلوج....يعني مش ممكن اللي تكون فاكره واد جريء و مقطع السمكه و ديلها يطلع يا عيني خيبه..او مثلا اللي تفتكروا ظريف تستتقل دمه لما تقابله..و ايه ده...ياي البلوجر لمّ...
انا بقى في اخر نقطه ديه انا متفق معاها تماما...تماماااا....لان النت بيدي حريه رهيبه تقدر تقول كل اللي في نفسك..مش بتكلم انك هتكذب في شخصيتك..او هتصطنع مثلا عشان ده على طول هينكشف...بس فعلا ممكن يكون الواحد من جواه انسان جريء افكاره متحرره بس مبيقدرش يخرج الافكار ديه و هو مواجه الحياه بوشه بس لو مصدّر بلوجه للنت يقدر ونص...:)..ممكن يكون ظريف جدا بس خوفه من رد فعل الناس مانعه من ده...خايف حد يكسفه...
شايفك بتبتسمي يا ندى..:):):):)...انا مش بتكلم عن حاله شخصيه و ربنا العالم...دنا حتة سكره في الواقع و الله.....و اسالي عليا...انزلي كلية طب...تالت شجره على ايديك اليمين....بس ابوس ايديك..متسأليش عللى ارتعاشه...متفضحنيش :"(....وحياة ولادك اللي جايين ان شاء الله قريب..اهيئ اهيئ....
....بجد يا جماعه لو حد عنده اي موقف عن الموضوع ده بجد يا ريت يشاركنا بيه... حتى من غير ما يقول اسامي لو بينكسف....
اه و النبي عندي سؤال من زمان...يا جماعه ايه احسن؟..ان كل واحد ارد عليه رد نفصل ولا كذا واحد مع بعض...حقيقي ده سؤال حساس الكومنتات ديه حاجه حساسه اوي عندي...تقريبا ملتهبه...:)
No comments:
Post a Comment