O TV

انا عن نفسي بعترف..انا واحد من الناس معندوش القناه ديه و مش مكسوف...عادي الفقر مش عيب...مش عايزه تيجي عندي على الريسيفر...يمكن ده كان بيسببلي احراج الاول و احساس بالنذقص بس بعد كده اتعودت...
مشدنيش غير لانها مش عندي كنت بقول اشمعنا القناه ديه مش عارف اجيبها...طبعا ده بمعزل عن انها جابت اميركان باي مش مقطع و غيرها من المشاهد الجنسيه في الافلام الاجنبيه ب اعتبار ان هو ده اللي بيعجب المشاهد البسيط...بس انا مكنتش عندي و عادي خالص...بس كنت عايز اتعرف عليها بصراحه عشان قلت نجيب ساويرس عامل قناه اكيد مكلفها كتير...
لحد بقى ما رحت عند خالتي و بالصدفه كانت جيباها...صدقوني انا مش فاكر اسم البرنامج بس فجأه جيه التتر و بعدها ظهرت بنت و شاب :)...و قالوا بقى انهم كالعاده هيناقشوا اهتمامات الشباب المصري...و فعلا
كان اول اهتمام لمسني و حسيت انه بيعبر عني كانوا مستضيفين شاب زي الورد و بنت اموره هو عباره عن اصغر قائد موتوسيكلات هارلي هدسون في مصر تخيلوا!!اسم النبي حارصه و صاينه...ماشاء الله جاكت اسود و زعبوط على دماغه و اخر حلاوه و البنت تبقى امينة عام جمعية سائقي موتوسيكلات الهارلي هدسون في مصر شوقتوا ازاي :)...و بئى اسئله قد ايه تهمني ك شاب طالع عينه 7 سنين في طب انه ليه مثلا ليكوا لبس واحد يقوم المحروس مجعوص في الكرسي و يقول ان ده بيخليهم يتعرفوا على بعض و بيولد نوع من الالفه بينهم و ان السائق الاول في العصور الجاهليه كان بيلبس كده ف ديه سنه...و سؤال مهم تاني انه ليه الجاكت الجلد بالزات اسود ف قد ايه الولد اتخض و مردش ان سؤال صعب قامت البنت قايله ايوه ده عشان الماتيريال ديه احسن حاجه لقائد الهارلي هدسون عشان بتحميه لما يقع...
كمان الاهتمام التاني اللي بيحتك بهموم الشباب المصري من الداخل كان الاستاز محمد ...مين ده؟؟؟محدش عارف...ده ربنا يحفظه من اوائل قافزي البانجي جمبينج في مصر...تخيلوا قد ايه مميز...ده بيربطوا فحبل و يرموه من فوق و يفضل بقى متعلق في الهوا بحبل استرتش....و قاموا منزلين صور من المهرجان القفز اللي اتعمل قدام الاهرام و قد ايه الشباب كان مبسوط هناك و فعلا اتحلت مشاكله بعد تالت نطه
الضيف التالت كانت بنت ..اشهر مغنية مش عارف ايه في مصر ...طلب منها تغني طقوقه قامت مغنيه حته من اغنية قام المزيع و المزيعه الله ما شاء الله...ايفانسنس معانا في الاستوديو...و نزلوا بالصور لاخر حفلاتها و قد ايه الشباب المصري كان متفاعل معاها....
والله يا جماعه المسأله ملهاش دعوه بالطبقات...لا خالص ما هي نفس المشاكل على الكل و لكن بدرجات مختلفه...هي ليها عهلاقه بالتفاهه من المهتم و من القناه.....و ربنا يخليلنا ال O TV....

الانتماء

ايه هو الانتماء؟؟او ليه موجود؟؟...
يعني...انت و انت طفل...متعرفش حاجه في الدنيا...ليه بقيت تحب بابا و ماما و عندك انتماء للبيت...عشان قاعدين معاك على طول...واخدين بالهم منك....بيعملولك اللي يريحك...انت عيل ولا فاهم حاجه...الاتنين اللي هتطلع تشوفهم هيبقوا ابوك و امك عشان بس الناس اللي هتقول غريزه....لو قلنا ان ابوك و امك رامينك...محدش بيسأل فيك...سايبينك في الشقه لوحدك...تواجه الضلمه و الخوف و محدش بيعلمك ولا يسأل فيك...بس ايه...سايبنلك مية الحنفيه مفتوحه....تفتكر بقى لما تكبر و ميبقاش عندك انتماء للبيت ده هيقدروا يقولولك و الميه اللي انت شربتها؟؟؟؟؟؟؟
الانتماء عطاء بينتج عنه احساس بالولاء والحب....مش بس الواحد يدي و خلاص....ولا ايه؟؟!!

على فكره عكس الانتماء مش الخيانه..لا...ابدا...عكسها عدم الانتماء....

هو لسه ممكن ؟ 2

هو لسه ممكن يكون في امل يا جماعه؟.... لسه في امل في اي حاجه؟...مش عايزاجابه متسرعه ايوه فيييييييييي من حد متحمس وكلام زي لو بطلنا نحلم نموت....الحلم غير الامل يا ناس....ولا عايز اجابه متسرعه من حد يائس لا مفيش امل...و هنعمل ايه و ما ب اليد حيله .... لسه ممكن يكون في امل بعد كل اللي احنا شايفينه ده.... لسه في امل في انك تقعدتذاكر تذاكر تذاكر و تتعب نفسك وانت بتحلم بحاجه مع انك في الاخر عارف انكمش هتاخد الا البواقي.... لسه ممكن تشتغل وتصلح وتحلم بعيشه احسن وانت عارف ان في مليون واحد بيهد اللي بتعمله من غير قصد عشان جاهل او بقصد عشان هوعايزك تفضل في اللي انت فيه... لسه ممكن يكون في امل انك تشوف ناس غير الناس...تعامل تاني و ظروف تانيه مع انك كل يوم بتشوفهم بما فيهم انت من سيء لاسوء...
ولا نقعد نبص على قصص النجاح و نقول اه ممكن اهو و ده الدليل و شوف فلان وشوف علان ما انت برضه هتلاقي اللي يقولك ده واحد في 70مليون هتقول لا اهو ادي مليون مثال هيقولك ماهو في 70 تانين منجحوش..هتقوله ايه؟ يا جماعه انا عارف ان الامل في ربنا كبير و مبينقطعش و ربنا قادر على كل شيء بس ربنا مش هيغير حاجه الا لما احنا نتغير... و عشان احنا نتغير طبعا الجمله المشهوره لو كل واحد بدأ بنفسه....بس يا جماعه لو دي تفتح عمل الشيطان...لو ديه معناها اننا كلنا لازم نشتغل...كلنا نفسنا في حاجات احسن بس مش كلنا هنشتغل.... لو انا اشتغلت و مغيرتش حاجه وفضلت كل حاجه زي ما هي يبقى انا ذنبي ايه.... ذنبي ايه ما انا ابتديت و مخدتش حاجه..تعبت و غيري كان مرتاح... انا اشيل وزره ليه............

ديه يا جماعه دعوه للتفكيرمش للتكفير...انا مش يائس انا بس بفكر....

ولا انتم ايه رأيكم

هو لسه ممكن؟

لسه ممكن تواجه كل الناس بطريقتك و شخصيتك الطبيعيه؟؟؟ انا رأي انه لا....صعب اوي..مش في الزمن ده بس...لا في كل وقت....هتلاقي ناس تحب ده...وناس متقدرش انك بتتعامل على طبيعتك... انا هنا بتكلم عن الشخصيه....صعب اني اعامل الناس كلهم بشخصيتي الحقيقيه...و متهيئلي كل الناس كده الموضوع مش مرتبط بان الواحد تكون شخصيته ضعيفه و يضطر يداريها عن الناس ورا قناع صلب..او نظره حاده اواي حاجه تخلي في حاجز بينه و بين الناس عشان ميقربوش و يعرفوا شخصيته على حقيقتها فيبتدي الاستغلال و التعامل معاه يختلف و الضغط على نقطة ضعفه خصوصا في الزمن اللي احنا فيه ده... لا ممكن كمان يكون الانسان قوي جدا و يضطر انه يكسر القوه ديه و يتعامل مع الناس بصوره هو يشوفها انها تساهل منه و ان ده ميتناسبش مع شخصيته الحقيقيه و ده برضه بيحط حواجز بينه و بين الناس عشان محدش يقرب ويعرف و ينفر منه او يحس ان اصدقائه بيتعامه معاه و هما خايفين منه... بس يا جماعه في الحالتين الموضوع مبيتظبطش...يعني بيقلب عكس في معظم الاحوال مبيقدرش يمسك العصايه من النص ده اللي بيشكل عبء نفسي رهيب عليه ...و كمان اصلا كفايه اللي بيحس بيه و هو بيداري شخصيته الحقيقيه عن الناس... يمكن لو فكرت شويه هتلاقي ان الشخص ده اخرت العذاب النفسي اللي هو فيه يا اما بيقول لا انا هعيش على طبيعتي مهما كان وده ممكن يخليه يتقوقع على نفسه في الاخر وميكنش ليه اصحاب...او بيتغير مع الوقت وبينسى شخصيته الاولانيه وده ممكن يبان للوهله الاولى انه حاجه كويسه بس لو فكرت هتلاقي ان لو كل الناس مشيت في دايرة اللتغير ديه هيبقوا في الاخر ستمبه واحده بيتعاملوا كلهم بنفس الطريقه........ ولا ايه؟

شخصيات في حياتي 3...

Tuesday, April 10, 2007

شخصيات في حياتي 3...

الاول اعتذر عن التأخير في الجزء ده بس و الله ما باليد حيله حبايبي كتير و بيتاجوني..و بجد اشكركم عشان انتم حققتولي حلم طفولتي..:)
النهارده هتكلم عن شخصيتين تانين…انا قابلتهم..و اكيد انتم كمان…نموذجين منتشرين بشكل غير عادي…
5-الناقص:
الناقص مش قصدي الانطباع الاول اللي هيجي في بال كل واحد ممكن يقرا الكلمه..مش قصدي الناقص اللي هو بيستندل مع صاحبه او حتى الناقص اللي بيحاول يحسن نفسّه او كده..لا انا قصدي الناقص اللي عارف انه ناقص و عشان يبقى قدام نفسه كويس يقلل من الناش اللي حواليه..
الناقص هو اللي لما تكون جايب درجات عاليه في الامتحان و يكون هو جايب اقل منك يستكتر عليك فرحتك..يفتكر انك هتبصّله انه اقل منك..فعقدته ديه تدفعه انه يقلك يوميها….اصل الامتحانات ديه عايزه حمار يحل فيها عشان يجيب نمره او تقدير يتصادف سبحان الله انه نفس التقدير اللي انت جايبه..و كمان يتمادى في ندب حظه انه اتظلم عشان هو مخّه نضيف مكنش المفروض يجي في الكليه اللي يتصادف برده انها نفس كليتك…:)
الناقص اللي لما يجيلك البيت و تضايفه و يبان انه مبهور..يعزمك بعدها تاني يوم و يقدملك نفس الحاجات و هو بيقلك ان الحاجات ديه عند اي حد غيره زي الزفت..
الناقص اللي لما يلاقيك جايب عربيه...يوم ما تجيبها..عقدته تنقح عليه و يفتكر انك هتبصله انه اقل منك..و انت تقله تعالى اوصلك...يقلك توصلني ايه...انا اركب الخرده ديه..ده انا امشي اكرم لي...
الناقص هو اللي لما تحقق هدف..او حاجه هو كان نفسه فيها..ميبقاش طايق يشوفك..و تاني يوم اما يقابلك...يشتمها و يحقّر منها و ممكن يقول انها اتعرضت عليه..بس هو عشان بيفهم...رفض..
الناقص ده نقمه..هادم الفرحه..كاسر النجاح..انسان فعلا لو صاحبك..عمرك ما هتفرح ب اي حاجه..لو مش عشان كلامه احبطك..هيبقى عشان بتفكر هو ليه بيعمل كده......

6-الدلدول...
الدلدول ممكن يجي في بالك انه زي الشخصيه الهلاميه..بس لا...الشخصيه الهلاميه ده اتكلمنا عنه قبل كده انما الدلدول فده اللي بيقلد..بيحط شخص معين قدام عنيه..يقلده في كل حاجه...صح او غلط..لايقه عليه او مش لايقه...بس بيقلد و خلاص...
الدلدول ده مبيتعرفش الا في المشاكل ممكن نقول...يعني مثلا لو تلاته صحاب و حلوين و تمام التمام مع بعض..مرّه اتنين اتخانقوا..الدلدول عمره ماهيحاول يصلح بينهم..لا..هيجري يلحس جزمة واحد فيهم...و يزعل منك و ممكن يشوفك و حتى ميسلمش...
الدلدول ممكن يشوف انسان كويس و يقلده في كل حاجه...حتى في هواياته و طباعه و تفكيره و كلامه و ذوقه و كل حاجه....بس هي النقطه ان شخصيته بتتمحي..بتنتهي..هو لو بس يفكر ان علاقته ب الانسان ده ممكن تنتهي في اي لحظه و ساعتها هيلاقي نفسه في الهوا..معدوم الهويه..مش قادر يعيش ولا يتعايش عشان ببساطه فقد كل شخصيته بخسارة الشخص ده..لا و المصيبه لو عارف فبيبقى زي العبد ليه لانه عارف الي فيها..و حتى لو تغاضينا عن الجزء ده ف فين صحابه...صحابه اللي شايفينه انسان متغير..صحابه اللي شايفين الاصل و الصوره...و عارفين زي ما هو عارف ان الاصل ديما احلى من الصوره..الاصل الوان..و الصوره لونها بهتان..ده اذا مكنتش ممسوحه....

Posted by ert3ashat at 3:34 PM 12 comments

شخصيات في حياتي 2.....

Thursday, March 29, 2007

شخصيات في حياتي 2.....

النهارده هكتب الجزء التاني من موضوع الشخصيات انا خدت بالي ان في ناس افتكرت اني بنتقم على البلوج من حد..لا و الله يا جماعه..خالص...هو اول شخصيتين هما اللي كانوا في بالي ساعتها بس انا هكتب عن انماط كتير من البشر قابلتها منها الحلو و منها الوحش و اكيد هتلاقوا نفسكم قابلتوا ناس زيها...
3-الجدع:
انا هتكلم عن الجدع هنا بمفهوم مختلف عن الصوره التقليديه...من وجهة نظري الخاصه جدااااا و مبنيه على تجربه و الله..
انا شايف..و انا لابس النضاره اكيد..ان الجدع..لو في شله..5 صحاب مثلا..كلهم بيحبوا بعض بنفس الدرجه و واحد فيهم حصلتله مشكله...الجدع اكتر واحد هيحاول يساعده بقلب..مش شرط يعرف يحلها...لا خالص...مش شرط يكون احسن واحد هيعرف يتصرف و يحلله الموضوع في ثواني...
يعني لو انت في خناقه,,او انتي مش مشكله يعني..ف الجدع مش صاحبك اللي في طول الباب و عامل زي الدولاب ماشاء الله..لا..كتر خيره اكيد عشان ده هيدخل ياكل اللي بيتخانقوا معاك و يخلص الليله..بس ما ده الطبيعي انه هياكلهم...انما الجدع هو اكتر واحد هيتخانق بقلب...الجدع هو اللي هيفضل معاك بعد الخناقه يطبطب عليك و يواسيك ويداويك....
لو اغمى عليك..الجدع مش اللي هيجي يديك قلمين على وشك يفوقك و بعدها يسيبك و يمشي...لا..الجدع هو اللي هيبقى ملهوف عليك و تقدر تعتمد عليه حتى لو مش هو اللي هيشيلك بس هتبقى عارف انه بلهفته و خوفه اللي بقلبه مش هيسيبك اللا لما يطمن عليك....
الجدع مش هو صاحبك اللي معاه عربيه و انت عيان يقولك خلاص هبقى اعدي عليك و نروح ل الدكتور...الجدع هو صاحبك اللي حتى لو معاهوش عربيه و انت مش قادر تنزل و يقولك..انا هجيلك اسندّك و نروح للدكتور دلوقتي حتى لو الدكتور بعيد
الجدع هو اللي ممكن ميبقاش في ايده الحل..اللي ممكن ميكنش اكتر واحد هيعرف يتصرف...بس معاه هتبقى مطمن..انه حتى لو صرخ..صرخ بس..صرخته عشان من قلبه هتخلي الناس كلها تتصرف و تهتم..وده عشان احساسه من قلبه.......

4-الكذاب:
الكذاب ده بقى موضوع تاني خالص..انا مش بتكلم عن كذاب مثلا اي واحد بيكذب..او كذاب اللي بيكذب كتير..لا..عشان كلنا يا جماعه بنكذب..سواء كذبه بيضه كذبه برتقاني..كذبه كاروهات..بس كلنا كذبنا و بنكذب و هنكذب كمان...
انا بتكلم عن الشخص اللي الكذب في دمّه..اللي ممكن تكلمه في التليفون ساعتين و يفضل يلف و يدور و يلاوع مع انها حاجه تافهه جدا..بس في اخر المكالمه تكتشف ايه ده...انا مطلعتش بحاجه مفيده...انا مش عارف..هل الكذب بيبقى مغمي عنيه و هو مش عارف اللي بيكذب فيه ده يستاهل ولا لا...بيكذب و خلاص...هي المشكله مش في النقطه ديه...ديه حاجه تفقع المراره بس..انما متئزيش...بس اللي الواحد ممكن ميخدش باله منّه في ساعتها ان الانسان ده لا يؤتمن...لا يؤتمن في اي حاجه خالص...لا و اللي يغيظ انه ممكن يضايق جدا لو انت شكيت في كلامه..مع اني للاسف مع قساوة التعبير بس هو بقى زي الست اللي خانت جوزها و هو عرف و تضايق جداا لو شك فيها و تقلوا:اخص عليك يا حوده........
سيبكوا من ده كله و انا جايب مثال حيّ..و ربنا عالم ان المثال ده حقيقي بلا اي تجنّي من اي نوع...كان لي صديق قريب مني..و زميل تاني اعرفه من النوعيه ديه..المهم هما الاتنين كانوا صحاب اكتر و كانوا على طول مع بعض..الزميل ده كان في علاقه بينه و بين بنت و العلاقه ديه انتهت بعد كده..ديه حاجه انا مكنتش اعرفها في وقتها...المهم الصديق ده البنت ديه لفتت نظره...و ايه بقى عايز يكلمها..فيا ترى يقول لمين؟؟؟...قال لصاحبه اللي على طول مع بعض..و بيسافروا و يخرجوا و كده..من الاخر صاحبه الانتيخ....فلما قال لصاحبه...صاحبه قال..طب تمام و الله..وقام مشجعه انه يتعرف عليها..و قعد يقله يتعامل معاها ازاي...و يجيب النمره ازاي ولو عايزها اديهالك انا و كلام من ده..و كان بيتصل بيه يوميا يتابع تطور الموقف...اصحاب بقى.....................طبعا انتوا متخيلين النهايه المأساويه..لعلاقتهم..ولعلاقة الولد ب البنت..و لكل حاجه....مع العلم ان الولد ده البنت كانت لفتت نظره من زمان و كذا مرّه سأل صاحبه عليها و انكر انه يكون بينهم اي شيء..............
يا جماعه انا مش بهاجم حد ديه شخصيات و وقائع بتحصل معايا و ممكن يكون كل واحد فيكوا عنده قصص زيها...مش بكتب عشان حاجه تتغير في حد...بس للاسف في حاجات بتسيب علامات في الواحد بس اللي بيهوّن على الواحد انه بيكتسب خبرات جديده....يقدر يواجه بيها الناس..بس ارجع و اقول ان ده بيدمي القلب..بيجرحوا..بيبوظ وشه البريئ اللي اتولد بيه....بس عمليا..بيبقى القلب كده.....احسن كتير...على الاقل الواحد مبيبقاش همّه شكل قلبه قدام الناس من كتر الجروح اللي فيه

Posted by ert3ashat at 12:21 PM 18 comments

Labels: شخصيات في حياتي

شخصيات في حياتي الجزء الأول

Thursday, March 22, 2007

الموضوع ده هيكون عن الشخصيات اللي الواحد ممكن يقابلها في حياته...أكيد كل واحد هيقرا هيحس انه في حد عرفه ليه شخصيه من اللي هتكلم عنهم...بس بما ان الموضوع كبير ف أنا مش هقدر أتكلم عنه في مره واحده فهاخده على أجزاء وياريت أي حد عنده مثال على شخصيه يقولها يمكن أكون اتعاملت مع حاله زيها ناسي, و أقدر أكتب عنها...

1-البنت المصلحجيه:
أنا قلت بنت مع ان في ولاد مصلحجين برده بس متهيألي بيبقى قليلين أو مش بنفس نسبة البنات لما بيتعاملوا مع الولاد عشان مصلحتهم..
دول نوعين..النوع الأول بيبقى مصلحجي في حاجات عامه..أكيد اي ولد في الجامعه اتعامل مع بنت ب النظام ده او حتى صاحبه حكاله...مثلا تلاقي بنت ميعرفهاش خاااااااااالص..جياله خصوصا لو شاطر وتسمع الحوار ده...:انت حماده صح؟انا سوسو زميلتك في السكشن..طبعا حماده هيرسم وش مفقوع..أيوه ازيك...بس البنت تتعظ؟؟تتهد؟؟ابدا هييين نفسك ولا تهين مصلحتك..ممكن يا حماده تجاوب الامتحان و تبقى تخليني انقل الاجابات..مش عايزاك تغششني استغفر الله انا بس عايزاك تبعد و تديني المجال..اصل انا عكيت في الامتحان وهسقط والدكتور طردني وامي في المستشفى وابويا بيرضع العيال و أخو..خلاص خلاص يا سوسو مش مشكله ولو اني مبحبش اغشش حد وباين على كلامه انه محرج و مفقوع..بس سوسو تتعظ؟؟لأ طبعان هييين نفسك ولا تهين مصلحتك...طبعا بعد الامتحان ميخلص سوسو هتفتكر كرامتها وتقوم بصاله بطرف عينها وتقوله ميرسييي يا حماده وبعد كده تعدي من قدامه متسلمش عليه أصلا ويجي يوم النتيجه يلاقيها جايبه أعلى منه...بس لا عزاء للهطل!!!
النوع التاني البنت لما بتبقى عايزه حاجه خاصه...خروجه...عشاء فاخر..تسمع كلمتين حلوين..تحس ان الولد بيجري وراها...انا ديه بشوفها زي فتاة الليل...بس الفرق ان ديه بتدلق حنيه تاخد فلوس بس صاحبتنا بتدلق حنيه و تاخد خروجه و فسحه حلوه على قفى العبيييييييط...

2-الشخصيه الهلاميه:
ودي انا لسه مقبلتهاش بس صاحبي حكالي عليها...و في الحاله ديه بيكون الانسان مالوش شخصيه مستقله...مش عايز يكونله...بيتلون على حسب الناس اللي معاه...يمكن عنده نقص و يمكن كمان جبان...بيكون كل أمله في الحياه انه يبقى زي الناس المتواجد معاهم في اللحظه ديه..عشان يرضيهم..يبقى منهم...مالوش شخصيه...وده ربنا يتولاه...يعني لو ماشي مع ناس بتشتم...هيشتم اكتر منهم...عشان يكون منهم..ومعجون بطينهم...يمكن بعديها بساعه يمشي مع ناس بتوع ربنا..يقوم سابقهم على الجامع..ويبقى ليهم امام..وعليهم قوّام..وينصح فلان وعلان..مع ان علان ده هوّ هو نفس الشخص اللي كانوا لسه بيشتموا وبيقولوا كلام ولا موْاخذه ئبيح ده مش بعيد يحك دماغه في الارض عشان يطلاعله زبيبة صلاه مع انه بيقنع ميين؟!!مهم عارفينه بس اهو بيوهم نفسه انه منهم ومعجون بطينهم عشان يكمل النقص اللي جواه
يمكن يمشي مع ناس بتوع مزيكا..و يكونوا بيحبوا روبي..يجري يجيب جهاز جيم ويلعب عليه طول الوقت وهو بيغني ليه بيداري كده...يمكن كمان يعري بطنه و يقفلهم ببدلة رقص عشان يعحبوا بيه ويحبوه..نفس اعجابهم بروبي..يسقط على نفسه حبهم ليها فيحس انهم بيحبوه زياده عن ما يعيش بشخصيته..عشان يبقى منهم ومعجون بطينهم..
يمكن يمشي مع بنات لييل..مع انه ولد..بس هنعمل ايه؟!!..حاسس انهم احسن منه..عايز يقربلهم..يتمحلسلهم..مع انه ولد بس يجري يسبقهم على البيوت...ويقطع عليهم كمان..ويجتهد ويعرق و يشتغل هو اكتر منهم حتى في وقت راحتهم......
يمكن يعد مع الاخوان وعلى طول يطلع كتب حسن البنا ويفتي بكلام...عارفه او مش عارفه وبعدها بثواني يمشي مع شوية شيوعيين وعلى طول انا قريت كتاب لماركس و عاجبني كذا وكذا مع انه يمكن تكون جمله سمعها في التلفزيون ويعمل عليها حدوته وروايه...وبليل يكون مع ناس مع الحكومه..ويبقى هو معاها اكتر منهم..ويتكلم ويحكي ويدافع ل والغريب يشتم الاخوان و الشيوعيين اللي كان لسه معاهم من ساعات..بس ايه المانع طالما بيكمّل نقصه وبيضحك على نفسه..مع انه مفقوس و رحته فايحه منه...بس هنقول ايه...عشان يبقى منهم و يوسّخ طينهم...

اللي زي ده بجد محتاج الناس تدعيله...انه يثبت على 5 شخصيات بس مش أكتر بدل ما هيجي وقت يشوف نظرة استحقار في عنين كل اللي حواليه على الاقل كده هيشوف نظرة شفقه

لو عندك موقف او تعامل مع حد كده يريت تشاركني بيه

عقبال بقية الشخصيات

Posted by ert3ashat at 1:35 PM 11 comments

Labels: شخصيات في حياتي