Tuesday, June 26, 2007

سمكه..في جوانتنامو.....1

Friday, April 13, 2007

سمكه..في جوانتنامو.....1


انا بكتبلكم...عشان انا تعبت يا جماعه...تعبت..انا اللي شفته في البيت ده مش طبيعي...محدش يقدر يستحمل كده...انا مهما كان سمكه..من لحم و دم..
انا من ساعة ما دخلت البيت ده منمتش..مريحتش ثانيه واحده....انا شفت اهوال...محدش ممكن يسمع عنها..انا دموعي غرقت البوفيه...طبعا مستغربين بوفيه ايه..ما ده جزء من اللي بشوفه...انا هحكلكم حكايتي من الاول....

الاول البيت اللي انا فيه ده...مليان ناس..ملياااان...من كل الاحجام و الاطوال..من اول و حش و انت طالع بقى...
الناس هنا مش متخيله اني سمكه..بريئه...محتاجه اقيل ساعتين الضهر..او حتى بليل..بس محتاجه انام..محتاجه اكل...محتاجه اقضي حاجتي بهدوء زي ما الوحوش ديه بتقضي حاجتها في هدوء...

انا كان معايا هنا سمكه زميله..كنا مع بعض في الحوض بس هي كانت صغيره...مستحملتش و ماتت على طول...مقعدتش كام يوم و سلّمت نمر....انا هحكيلكم عن يومي من اول ما يبدأ..

الصبح...الساعه سبعه..يجي وحش صغير..اصغر وحش في البيت ده..بس ده لا يمنع انه كبير اوي...اصل البوفيه ده جنب الباب..بيجي كل يوم الصبح بنفس اللبس..الناس ديه الظاهر عليها معفنه...اكون خلاص ما صدقت البيت هدي بليل شويه و هنام..القيه قرب بالكورتين الكبار اللي في وشه من الحوض..بجد نفسي مره ادخّله جوه يشوف الرعب اللي انا بصطبح بيه..و فجأه القيه بكفّه اللي هو في حجم الحوض رزعه و انا اتخبطت في القزاز و الامواج ظهرت في الحوض و ديما بتبقى اخر حاجه بشوفها قبل ما يغمى عليا و هو فاتح بقه مببقاش عارفه ده عشان سعيد بنفسه ولا ناوي ياكلني انا و الحوض...

في بقى...وحش تاني..شكلها قد الوحش الاولاني بس هي شعرها طويل...ديه بقى مقلكوش..انا بعد ما بفوق من الاغماءه...ببقى عادي زي اي سمكه...عايزه اريح..اقعد في هدوء..تقريبا الوحش ده بينزل نفس المكان بتاع الوحش الاولاني...بس ديه مواعدها مختلفه..انا ببقى في قعر الحوض..زي اي سمكه غلبانه مغلوبه على امرها..القيها بتقرب من الحوض و في عنيها نظرة خوف...معرفش ده من ايه..ده انا اصغر من صباعها...انا بقوم لازقه في القعر زياده و متحركش...بقول بلاش استفزها محدش عارف الناس ديه ممكن تعمل ايه...القيها....القيها...اهيء..اهيء...تقوم راجّه الحوض..اه و الله...رجّاه...و تعمل دوامه كده ف انا افضل الف مع الميه و اخبط في القزاز...القيها هي على وشّها علامات الارتياح....مع اني بكون بتوجع...مش بقولكم...وحوش و الله..:(...انا بقيت لما القيها بتقرب من الحوض اقعد الف و اخبط في القزاز القيها نبسوطه و تكمل طريقها...

طب معلش يا جماعه...انا مضطره اقفّل دلوقتي لحسن جلسة الفلاش هتبتدي..انا عارفه..مش فاهمين هحكيلكم المرّه الجايه...بس ادعولي..اكون ما اتعمتش...

No comments: