Full Stop

so
it will be a FULL STOP .

كفاياك عذاب

انا ليه بروح؟!
ما انا ممكن افضل..
قاعد مكاني..
سلطان زماني..
ولا شيء هاممني..
ولا حد ياخد حته مني...
و على طول بفكر..
و انا ايش دخلني؟!!
هو يعني حد كان جيه سألني؟
علىطول يا قلبي..
تروح و تسأل
و تركز و تسمع
...................
مفيش جواب!!!
ولا حتى شكر..
ولا تقدر تقول همسة عتاب!!!
هتعمل ايه؟!!..خليك معايا
و بطل تفكر..كفاياك عذاب....

حساس انا

حساس انا..
و قلبي ورقه رهيفه..
بيطير بعيد لو هبت نسمه سفيفه...

قلبي انا..
مكسور كمان و بايدي ملصمه..
و اهو عاش جبان خايف من اللي هيألمه...
خايف يخلم ليجي اليوم وحلمه يصدمه..
و يكسر اخر حته فيه وللموت يسلمه....

حساس انا...
و كتير في تفكيري بشوف الضنا...
حاجات بسيطه ولا ليها اي معنى..
ايه و ليه و فين و مين و اشمعنى..
حاجات تعلم في قلبي انا..
وحاجات تسلم على جرح لصمته بشوية منى.

حساس انا..
و العيب في قلبي مش في حد فيكم
يا رب ارتاح من نفسي وليا يخليكم
ملكوش ذنب انا اللي قلبي ورقه رهيفه
يطير بعيد لو هبت نسمه سفيفه

مشتاق ليكي

Happy Valantine :)...
لكل اللي بيحب...و اللي مبيحبش....لكل واحد جواه حلم بملاك جميل ياخده معاه....

مشتاق لنظره من عيونك..
مشتاق للمحه من جنونك..
مشتاق لكلّك..
مشتاق احبك..
مشتاق اشيلك فوق دراعي..
و اخاف ساعتها ابقى واعي..
عايز اعيش لحظة جنونك..
لحظة اعيشها بين جفونك..
مشتاق لكلمة حب اقلها..
تطفي ناري و تدفي بردك.
هفضل معاكي و مش هنسى وعدك..
هشيل همومك فوق كتافي..
هتعيشي عندي في قلب دافي..
دنا مهما قلت والله مافي..
كلام يعبر عن جزء كافي..
من حبي ليكي يا مليكتي..
ياملاك حنون اسمه..حبيبتي..

عن الطفوله....

عن الطفوله....عن البرائه...لاي حد ندم انه لما كان صغير اتمني انه يكبر.....

يا حمامه طايره في السما
يا حمامه بريئه..
يا حمامه من روحي انا..
بتواجه الدنيا العجيبه..
يا حمامه طايره بعيد بعيد..
هربانه من فكري العنيد..
هسرح بنظري لفوق لفوق..
يمكن بشوفتك طايره افوق..
يمكن اصرخ الصرخه الشديده...
و اسمع الخلق البعيده...
مكنتش اعرف قد ايه..
جوايا عايشه و مش سعيده..
و اقوم انادي و ارجع انادي..
ارجعي يا روحي جوه روحي..
وصدقيني ....هبقى راضي...

انا..مش ملاك!!

تحديث:

انا رديت على التعليقات الحمدلله و كمان لي تعليق بسيط..
يا جماعه مش المفروض يكون الحزن على قد الكلمات...التعبير عن انك فرحان حتى هيبين الموضوع انه مبالغ فيه...اكيد انا مش عايش بكل الحزن ده و الا كنت مت من زمان...اكيد في جزء حزين هو اللي اساس الخواطر ديه بس انا حبيت اطمن الناس عشان تقريبا 14 تعليق بيواسوني و انا بجد اشكرهم على مشاعرهم الرقيقه الراقيه بس مش ده الغرض اني بكتب الشعر على البلوج و ان كان تعليقكم ده بيحسسني اني قدرت اوصل الاحساس ب الكلمات...
اسعدتوني كلكم والله و كل سنه و انتم طيبين

انا مش ملاك..
ولا انا حد قلبه قاسي ملوش شباك..
انا مش ملاك..
انا انسان حنون قلبه..جرّحته اشواك....

انا مش ملاك..
ابيض و بحلقه فوق راسي..
اسامح و اصالح و اصبح ناسي..
ولا انا حد قلبه قاسي..
يعادي و يحارب و يستحمل مئاسي..

مش قادر انساك..
ولا انسى عمري اللي ضاع في هواك..
سنين بتعدي و لسه برضه قلبي بيستناك..
نفسي في حد زيك ياخدني معاك..
نفسي حد يحمي قلبي اللي ياما حماك..
ما اصل انا...منيش ملاك.......
انا انسان حنون قلبه جرّحته اشواك...
جرّحته اشواك..............

انا عن نفسي همشي..

متيجي نمشي...
يلا....
يلا...
عموما....
انا عن نفسي همشي...
همشي و اسبني و اسيبيك و اسيبهم كمان...
همشي لدنيا بعيده وحشني الامان....

انا عن نفسي همشي...
عايزه تيجي تعالي...
مش عايزه خلاص خليكي في مكانك..
خدت ايه انا غير وجع قلبي و تعبي عشانك..
قلبي خلاص ياما بات تعبان..
و دماغي خلاص مبقتش حمل الكلام..

انا عن نفسي همشي..
بس انتي خليكي..خليكي هنا..
سيبيني مره ادوق طعم الهنا..
مبقتش عايزك ولا عايزني انا..
هسيبني هنا...
هسيب الضعيف المحب الخزلان..
و هبعد بعيد..مين عارف؟؟
مش يمكن يبقالي قلب الشجعان..

انا عن نفسي همشي..
هروح بعيد و ادفن في الرمله دماغي..
لا بقى في حيل اسمع..ولا حيل ادلع و الاغي..

انا عن نفسي همشي..
بس انتي صعبتي على قلبي اللي عمره في يوم ما صعب عليكي..
خلاص هخدك لو توافقي..
تمشي مسمعش صوت..
اكني ماشي مع تابوت..
مدفون في صحرا بعيده و فاضيه
شبه المكان اللي معاكي انا رايحه...
بتقولي ايه؟
.................................
خلاص هروح لوحدي مدام هموت...

هعمل ايه بس!!!!!!!!!!!!

حاجه خفيفه كده من من مواقف عاشق مغلوب على امره :)))

مبتسأليش..
شفتيني ولا مشفتنيش..
متعرفنيش..
لو كان في حاجه ولا مفيش..
حسستيني بندم...
على كل مره فكرت فيكي وملقتكيش..
كلامك معايا ده مش بقشيش..
ويا تديهوني يا متدهونيش..
قلقت عليكي و ايه يعني؟!
قلت طمنيني..و ايه يمنع؟!..
بس انتي مطمنتنيش
سبتي القلق ياكلني..
و اساسا ما افتكرتنيش..
هعمل ايه بس!!!!!!!!!!!!
هفضل اطلع اططلع اطلع..
و هنزل العاده...
على مفيش

CarTOOON

انا بحب الكارتون..ايوه...و فيها ايه....اي نعم كبرت شويه...بس لسه بحب الكارتون جدااااا...و ممكن اقعد اتفرج عليه و مزهقش منه خالص....

انا فاكر زمان لما كنت صغير...كنت بقعد استنى الكارتون لما يجي...كان بيجي نص ساعه كده من 4 الى 4 ونص و كنت ناقص ادمع و هو بيخلص...
حاجات كتير و معاني كتير اتشكلت في حياتي من الكارتون ده...كان بيجي كارتون اسمه ليدي...بنت كده صغيره شعرها اصفر و رقيقه كده و ضعيفه و بما اني اول بنت شفتها كنت وصلت اولى اعدادي فديه كانت الصوره الوحيده للبنت اللي انا اعرفها....و اللي ممكن تلفت نظري لحد دلوقتي....
افتكر كمان كارتون بنك بانثر....ده هما مثلا بتاع 20 حلقه فضلوا يتعادوا على مدار 10 سنين و كنت على طول بشوفهم...كان ده الكارتون المفضل....و المحقق العجيب اللي معاه...كمان افتكر توم جيري بس ده كان تخصص اخويا بس لسه بحبه اوي برضه و متابعه...
كان في بقى كارتون عجيب كده شبه تصوير بتاع توم جيري بس بتاع ضفادع ساعات و ساعات ولد صغير كده بس ده مكنتش بحبه اوي بصراحه
كان في كمان بتاعه كده اسمها مغامرات سنان....و الليث الابيض....عدنان و لينا.....اللي بيقعد يفتح في بقه كده ب ايديه معرفش حد فيكم شافها ولا لا...
كمان زينه و نحول.....و اليعسوب صاحبهم....انا كنت بحب النحله التخينه شويه....بتعاطف معاها....:)))))))))....و التانيه ديه كانت عنيها مقفله علىطول.....كان في كارتون بيجي بيقولوا فيه "14 رجل من اجل صندوق"هاهاهاهاها انا فاكر الصوت لحد دلوقتي...مكن كان اسمه جزيرة الكنز....
طبعا كابتن ماجد...و الكاميرا و هي بتجيب اللي قاعدين في الاستاد واحد واحد و الناس اللي قدام التلفزيون و الناس اللي في الشارع و الناس اللي ملهاش دعوه و انا ساعات كنت بحس اني هطلع في التلفزيون بالمره ...و طبعا كل ده و ماجد بيشوط الكوره و كلنا عارفين ان رعد هينط يجيبها في الاخر...و الاخوان شوقي...و مازن الطيب...و ياسين بتاع الشوطه المزدووجه...و بسام العنيف......
كان اي مسلسل بيجي على قد حلقاته و بتبقى اخر حلقه ديه حزينه اوي عشان ببقى خايف المسلسل اللي هيجي بعده يكون مش حلو و حياتي تتعكر لوقت طويل

كانت القناه التانيه بقى بتعرض برضه حاجات بس ب الانجليزي مكنتش بتشدني اوي بس افتكر منها النينجا و بيونك سيكس....اخويا كان متابع اكتر مني....
مشيت الايام و دخل الدش و كنا الاول بنلقط قناة كارتون نيتورك و كانت بتجيب فلنستون....و كارتون تاني كده بتاع ناس من العصر الحجري....ديه كانت اكتر حاجات بتشدني...مكنتش بحب الكارتون بتاع الكلب ده اللي بيقول"يابا دبا دوووووووووو" كنت بستغلسوا اوي.....
كنت لما باجي مصر بتفقع بقى من الكارتون اللي هنا ده بحس ان مرارتي هتفرقع...و تيتى ساميه و دبدوبه التخينه و عروستي و سلسلة البرامج ديه...ده حتى الكارتون العدل اللي كانوا بيجيبوا كان في واحده كده تقعد تعلق عليه بصوتها لدرجة اني ببقى خلاص هقوم اخنق التلفزيون عشان اصلا الكارتون مش محتاج...الحسنه الوحيده اللي افتكرها كان جرين دايزر و كان بيجي قبل المغرب كده و البنت اللي معاه ديه اللي معاها اسلحه عجيبه كده في اماكن اعجب...:)))))))))) ههههههههههه....
يلا كفايه كده نكمل المره اللي جايه :)
كل سنه و انتم طيبين و رمضان كريم علينا كلنا ان شاء الله و افتكروني في دعائكم

بس خلاص

و لما يجي الليل و يهدي....
اكون في شارعكم انا معدي..
سامع صوتكم ورا الببان...
حاسس ايديكم على الحيطان...
بتنحت بتحفر عايزه الخلاص..
ودمعكم اللي نازله ما ليها خلاص..
مفتكرتوش ليه؟؟
مفتكرتوش ليه يوم ما ضربتم الرصاص..
على اخر قلب جواه اخلاص....
اديكم قاعدين..ندمانين...محرومين..
في حيطانكم...خبطوا الراس....
لا حد غاتكم ولا ساعدكم...
و هيغيتوكم ليه و كل اللي فاضلين..
من ندالتكم راضعين..
ومن سواد قلوبكم طالعين...
بس خلاص..
بس خلاص...
بس خلاااااااص.......

متكلمنيش

متكلمنيش
كنتي معايا
و ما اتكلمتيش
في حضن هوايا
و منمتيش
قلت بحبك
مسمعتيش
لمست قلبك
و محستيش

متكلمنيش
عشت عشانك
عمر بحاله
ولا مره سألتي
قلبي انا ماله؟!!
ولا فكرتي
ايه احواله؟!!
قلبي اللي بنى
عليكي اماله
بات زعلان
بات حيران
علقتيه في الهوا
و قطعتي حباله

متكلمنيش
قلبي خلاص
بات مكسور
بات مفطور
على حب
حبه ب اخلاص
على قلب
كان ليه خلاص
و اهو رجع تاني يتيم
جوه صدري حزين
وكل طلبه
تسبيله الانين

متكلمنيش
قلبي انا
متستهليش
حبي انا
خلاص
بح مفيش
عشانك انتي
مش راح اعيش
بس متفتكريش......
اني على حبك ندمان
حتى لو قلبي تعبان
ف انا في حبك
عشت الامان
بقلب ماليه الحنان
ولا مره عمره خان
و حتى اما مات....
مات انسان...

O TV

انا عن نفسي بعترف..انا واحد من الناس معندوش القناه ديه و مش مكسوف...عادي الفقر مش عيب...مش عايزه تيجي عندي على الريسيفر...يمكن ده كان بيسببلي احراج الاول و احساس بالنذقص بس بعد كده اتعودت...
مشدنيش غير لانها مش عندي كنت بقول اشمعنا القناه ديه مش عارف اجيبها...طبعا ده بمعزل عن انها جابت اميركان باي مش مقطع و غيرها من المشاهد الجنسيه في الافلام الاجنبيه ب اعتبار ان هو ده اللي بيعجب المشاهد البسيط...بس انا مكنتش عندي و عادي خالص...بس كنت عايز اتعرف عليها بصراحه عشان قلت نجيب ساويرس عامل قناه اكيد مكلفها كتير...
لحد بقى ما رحت عند خالتي و بالصدفه كانت جيباها...صدقوني انا مش فاكر اسم البرنامج بس فجأه جيه التتر و بعدها ظهرت بنت و شاب :)...و قالوا بقى انهم كالعاده هيناقشوا اهتمامات الشباب المصري...و فعلا
كان اول اهتمام لمسني و حسيت انه بيعبر عني كانوا مستضيفين شاب زي الورد و بنت اموره هو عباره عن اصغر قائد موتوسيكلات هارلي هدسون في مصر تخيلوا!!اسم النبي حارصه و صاينه...ماشاء الله جاكت اسود و زعبوط على دماغه و اخر حلاوه و البنت تبقى امينة عام جمعية سائقي موتوسيكلات الهارلي هدسون في مصر شوقتوا ازاي :)...و بئى اسئله قد ايه تهمني ك شاب طالع عينه 7 سنين في طب انه ليه مثلا ليكوا لبس واحد يقوم المحروس مجعوص في الكرسي و يقول ان ده بيخليهم يتعرفوا على بعض و بيولد نوع من الالفه بينهم و ان السائق الاول في العصور الجاهليه كان بيلبس كده ف ديه سنه...و سؤال مهم تاني انه ليه الجاكت الجلد بالزات اسود ف قد ايه الولد اتخض و مردش ان سؤال صعب قامت البنت قايله ايوه ده عشان الماتيريال ديه احسن حاجه لقائد الهارلي هدسون عشان بتحميه لما يقع...
كمان الاهتمام التاني اللي بيحتك بهموم الشباب المصري من الداخل كان الاستاز محمد ...مين ده؟؟؟محدش عارف...ده ربنا يحفظه من اوائل قافزي البانجي جمبينج في مصر...تخيلوا قد ايه مميز...ده بيربطوا فحبل و يرموه من فوق و يفضل بقى متعلق في الهوا بحبل استرتش....و قاموا منزلين صور من المهرجان القفز اللي اتعمل قدام الاهرام و قد ايه الشباب كان مبسوط هناك و فعلا اتحلت مشاكله بعد تالت نطه
الضيف التالت كانت بنت ..اشهر مغنية مش عارف ايه في مصر ...طلب منها تغني طقوقه قامت مغنيه حته من اغنية قام المزيع و المزيعه الله ما شاء الله...ايفانسنس معانا في الاستوديو...و نزلوا بالصور لاخر حفلاتها و قد ايه الشباب المصري كان متفاعل معاها....
والله يا جماعه المسأله ملهاش دعوه بالطبقات...لا خالص ما هي نفس المشاكل على الكل و لكن بدرجات مختلفه...هي ليها عهلاقه بالتفاهه من المهتم و من القناه.....و ربنا يخليلنا ال O TV....

انا ليكي

انا ليكي وانتي ليا
اديكي عمري وكمان شويه
اديكي قلب مليان حنيه
اديكي حبي
اديكي شوقي ولهفتي
اديكي كل الدنيا ديه

خليكي جنبي كمان شويه
دفي بردي بلمسة ايديا
زيحي همي و طيري بيا
كتير زعلت و ما هون عليا
غير سمعي منك "امسحها فيا"
او حتى قولة "حقك عليا"
دول زي بلسم
زي ميه على ارض عطشى
زي مرهم على جرح مهري
دفاني و قواني
و رد روحي فيا

غريبه جدا لما تبقى
"يا رب" هي بعد "شوقي"
" فكرت لما جيتي "قصري"
و سمعتك انتي جواه "قصايدي"
"لو في"عدت لكن بسرعه
ساعتها دورنا جوا "الدواير"
بس برضه
غريبه جدا لما تبقى
"يا رب" هي بعد "شوقي"

صدقيني حبيبتي
..... انا ليكي...و انت ليا...

الجزء الاخير مش هيفهمه غير عشاق مروان خوري :)

أنا مغمض

أنا مغمض
خلاص
مبقتش عايز اشوف الظلم قدامي
لو حتى ضيعت ايامي
مانيش مفتح!!

و مانيش هفتح
مش عايز اشوف نظرة امل فيا
لو كان عليا
كنت سبتكو من زمان و نسيت اللي كان
و اترحمت من عدابي اللي فاض بيا

يفيد ب ايه تقولوا لدموعكو عنواني
ده دموعكو في صحياني رعباني
و من نومتي وخداني
خدوها...خدوها ارجوكو من تاني

أنا مغمض
قافل على نفسي بجفوني
لو ينبكوم فيا ثواب
بضحكتكو دفوني
متسبوش العجز يملاني
ارحموني!!
ده انا جوايا حزن رباني
و اللي رباني
ما زرع جوايا.. اي اماني
سابني في دنيا لا بترحم
ولا بتسيب اللي يرحم
ولا اللي لسه قلبه انساني
ف انساني
و سيب الوقت ينساني
و حوشوا عيونكو اللي لمساني
خليكو زي دنيتكو...
سيباني

اعدوروني لانشغالي مره تانه بجد هرد على التعليقات في اقرب فرصه

الانتماء

ايه هو الانتماء؟؟او ليه موجود؟؟...
يعني...انت و انت طفل...متعرفش حاجه في الدنيا...ليه بقيت تحب بابا و ماما و عندك انتماء للبيت...عشان قاعدين معاك على طول...واخدين بالهم منك....بيعملولك اللي يريحك...انت عيل ولا فاهم حاجه...الاتنين اللي هتطلع تشوفهم هيبقوا ابوك و امك عشان بس الناس اللي هتقول غريزه....لو قلنا ان ابوك و امك رامينك...محدش بيسأل فيك...سايبينك في الشقه لوحدك...تواجه الضلمه و الخوف و محدش بيعلمك ولا يسأل فيك...بس ايه...سايبنلك مية الحنفيه مفتوحه....تفتكر بقى لما تكبر و ميبقاش عندك انتماء للبيت ده هيقدروا يقولولك و الميه اللي انت شربتها؟؟؟؟؟؟؟
الانتماء عطاء بينتج عنه احساس بالولاء والحب....مش بس الواحد يدي و خلاص....ولا ايه؟؟!!

على فكره عكس الانتماء مش الخيانه..لا...ابدا...عكسها عدم الانتماء....

لو كنت بجم

مشيت
مشيت في طريق الندم
حواليا الدنيا عدم
لا شايف انس ولا جن
كل اللي شايفه غنم
متساقه بدون اراده
متساقه للالم
و انا هنا بكتب شهاده
بكتبها من غير قلم
يمكن لو مكنتش انا
يمكن لو كنت بجم
كنت قدرت اعيش مبسوط
كنت شفت من الزمن كرم
مكنتش تعبت من حاجه
مكنتش عشت الظلم
مكنتش هبقى فاهم
ولا عارف معنى الشجن

اعدوروني لانشغالي هرد على التعليقات في اقرب فرصه

يوميات شراب 2

.......... اهيء اهيء.........
انا فعليا اخر ايام العز كان على باب المحل...الراجل مقدرش يصبر.!!!!!...هو خرج من باب المحل و قام ساند على الحيطه و قلع الجزمه...و....قلع الشراب القديم اللي مكنش فاضل منّه...غير ريحه و لون بنّي.....انا اتسرعت بس قلت يمكن كان جايله هديه من و هو طفل....عشان كده مقلعوش طول عمره...وقام راميه علىطول ايده وقع يا عيني على شوية قطط محطوش منطق....وقعوا في مكانهم...الله يرحمهم..بعدين لقيته انقض عليا وقام لبسني زي اي مجرم محترف على مرّه واحده.....

جوه الجزمه اتعودت مع الوقت اني اتعايش مع الكائن الاخضر ما احنا مع بعض 24 ساعه كل يوم بس بعد حوالي شهرين اكتشفت انها ورقه منسيه تقريبا ديه وصية الست الوالده الله يرحمها ...
بس الشهاده لله الراجل مكنش حارمني من حاجه الجزمه كان فيها شباكين...شباك على الارض بيجيب طراوه و شباك على الجنب بيجيب هوا و بالمره بطمن منّه على الفرده اللي على الجبهه التانيه....
المهم ان انا على ما وصلنا البيت كنت اتعلمت حاجه مهمه الا و هي ان مش كل شراب مبقع بنّي لازم يكون اداس بيه في طين..لا ممكن يكون اداس بيه في حاجه تانيه ...

لما وصلنا البيت دخلنا و حصل اللي كنت خايف منّه...وهو بيقلع الجزمه انا حسيت في صوابعه نظرة غدر..انه هيسبني...حاولت امسك في الجزمه على قد ما اقدر بس هو كان اسرع منّي......

و ابتدى يمارس حياته الطبيعيه عادي خالص و هو لابسني ....انا قلت لا بئى...اللي ناقص انه لما يجي ياكل يقلعني و يحطني فوطه على صدره ماهو مصدق لقى حتة قماش...انا كنت بقولها تريقه...بس.....بعد كده ده بقى حلم..انه بس يقلعني............

عيد ميلاد حزين يا قلبي..

عيد ميلاد حزين يا قلبي..
عيد ميلاد حزين..
لأ.......لأ.....
مهوش ذنبك ولا ذنبي..
ده اسمه اللي مكتوب عالجبين..
محدش عايش حزين بمزاجه..
ولا حد يحب يدندن...بصوت الانين
اهه..كلّه قدر ومكتوب..
لما نشوف واخدنا لفين....
اوعى تفتكر عيد ميلادك زمان..
ايام الطفوله والبرائه...
اوعى..لا يملاك الحنين..
حنين لا هيقدم ولا هيأخر
كل اللي هيعمله هيموت في قلبك جنين..
جنين الامل في بكره..
اللي هينسيك عذاب السنين..
عيد ميلاد حزين يا قلبي...
عيد ميلاد حزين............

يوميات شراب

اهو...الحمدلله..اخيراااااااااا.....يا رب يكون هو ده....ده شاكله راجل نضيف....و بيغير شرابه كل يوم....
ايه ده...انت يا بيهههههههه...انت رايح فين....ارجوك تعال...اهيء اهيء
نفسي ربنا يتوب عليا من التعليقه ديه بقى و من صاحب المحل الكشر ده وانا ذنبي اني بقالي شهرين متعلق ما هو لولا المحل المعفن...بس هنقول ايه نصيب!!!!!

اهي...في الست ديه..بس ايه ده..انا رجالي...مش مهم..يمكن تجبني لجوزها...
بس يا عالم جوزها ده ايه نظامه في الشرابات....اهيء اهيء...خليها على الله
يا رببببببببببببب
ارجوكي تعالي...تعاليي...
محدش بيسمع الكلام ليه...

ايه ده....ايه دههههههههه...الشراب مبيتقسش يا معفن....
ايه ده..
انت هتعمل ايههههههههه
...مفيش الا الزبون المعفن ده....امري لله...:"( :"(
و كمان بتتأمر على اللون ده كتر خيري اني هدخل في رجلك
و ايه الجزمه ديه...ايه الحاجه الخضرا ديه...سحليه!!!!!!!
لااااا انا بخاااااااااف
اهو...احسن من التعليقه في البرد كل يوم...او ده
اللي انا كنت فاكره..
اهيء اهيء

مع انّي

مع انّي..
واقف بعيد و واقفه بعيد..
من نظره واحده ناري تقيد..
نار حبّي
نار غيرتي و شوقي..
بجد نار..
تدوب حديد

اتخيلك..
في رقصه دافيه جوه حضني..
في نومه هانيه جوه قلبي..
الاقي فاجئه ممدوده قبلي..
الف ايد و ايد...

عايزه تخدك..
ترقص معاكي..
تنامي في دفاها..
تعيشي في هناها..
افكر اجري..
افكر اخدك لو حتى في سبيلك..
هموت شهيد...

بس ابص الاقيكي مسلّّّمه..
في طريقهم ماشيه و مطمنه..
اقول لنفسي..
مش هلومك..
انا هلوم اللي عاش لحبّه..
عيشة العبيد...........

التاج الحلال مبيضعش

التاج الحلال مبيضعش ....اه والله....شوفي يا شيماء...عدت شهوووور و بلاد تشيلني و بلاد تحطني و اسافر من هنا ل هنا و لكن...فضل تاجك في خيالي و مغبش ليله عن بالي.....تاجك في القلب و جه وقت الرد بس هرد على جزئين معلش :) نبتدي بقى...بسم الله الرحمن الرحيم
....

اسم مدونتك؟

ارتعاشات حياتيه

لماذا اخترته..وماهي نيتك من وراء اختياره؟

اخترته زي ما قلت في تاج قبل كده كانت كلمه كنت بقولها في حوار و بعدها بيوم عملت البلوج ف عدلت على الكلمه شويه J

اسم خفيف و يشد كده و جدييييد J

هل فكرت في إغلاق مدونتك؟..والسبب؟

انا فعلا قفلتها لفتره...كان في ظروف مكنش ينفع اكمل في الوقت ده و كمان كان في امتحانات بس لما الظروف عدت انا فتحتها تاني

صورتك في المدونة..رمزيتها؟

انا لسه محطتش الصوره تاني بس الناس اللي متبعين من زمان عارفين الصوره...سطح ميه كده بيتهزعشان نقطة ميه نزلت فيه....بتعبر عن الارتعاشات اللي جوايا J..

:)

لماذا دخلت عالم التدوين من الاساس؟

عجبتنيالفكره...كنت عايزافتح قدام نفسيمجال جديد اني اعرف ناس تانيه...مجتمع تاني اقصد كمان كنت عايز اعرض شعري و كتاباتي على الناس في صورة اختبار لقوة تحمل مرارتهم...:)

احلى جمله قيلت لك فى وصف مدونتك؟

كتيروالله...انتم ناس طيبين اوي...:)J

افتكر كومنت جالي من حفصه متهيقلي بتقول ان المدونه جميله و اني متعدد المواهب..:)..ارقص و اغني و اكتب الشعرو اقدس الحياه الزوجيه تحلم بمدرس JJ

:)

التعليقات بالنسبه لك ..اهميتها؟

يا نهار ابيض ديه حياتي كلها..اهيء اهيء...ده انا من غير تعليقات زي السمكه على الرمله..اوالجنّي من غير مصباح...او السي ديهايه من غير سي دي روم

احلى بوست كتبته ...ضع اللينك ..ثم اذكر لماذا؟

مممم شعر...كان بتاع تيجي

ولو كتابات كده ف قصة سمكه في جوانتنامو..

أفضل مدونة قرأتها؟

فى مدونات كتيير ... اى مدونه عملت فيها كومنت يبقى اكيييييييييييد عجبتنى

الله يمسيكي بالخير يا شيماء اجابتك وفرت عليا سؤال J

أفضل بوست قرأته؟ وضع لينكه؟

برضه كتيييير .. اى بوست عملتله كومنت يبقى اكيد عجبنى

والنبي انتي بنت حلال كده سؤالين اهم

بس لو شعر ف قصيدة مانيش خاطي من اروع ما قرأت مؤخرا

حد قل ادبه فى التعليق..ايه رد فعلك؟

اه باين....مش فاكر عملت ايه بس ما البلوج مفتوح على الشارع و اي حد ممكن يعدي يبص ده غير اصدقاء السوء بقى الله يمسيهم بالخير و بيهزر مع صاحبه يقوم شاتمه شتيمه قذره على البلوج كن انونيمس على سبيل المزاح J

بس زي ما احنا عارفين كل اناء بما فيه ينطح :)..و كمان كل بطيخه ولها لبها...و الشجره المتزهزهه بيزئلها الناس بالطوب :)

أسوأ مدونة؟0

مدونة حرملك بس مش معايا لنكها دلوقت

و في مدونه بتاعت واحد بيشتم الرسول برضه

أسوأ بوست..أسوأ مدون؟

نفس الاجابه الى فاتت

............................................................

............................................................

هيحصل ايه لإيميلك لما تموتى؟

ايه..ايه..هاا...قول بجد..انت عارف

عموما هيفضل مليان مليان لحد 3 شهور باين و محدش بيدخل عليه و بعد كده 9 شهور و يتمسح..ولاايه يا جماعه..:)

عموما ايميلي هيموت معايا......

اديتى الباسوورد لحد قبل كده؟

ايوه سوم ون بس

كانت إيه طبيعة علاقتك بيه؟

طبيعه خاسّه :)..بتحرج نفسكليه بس :)

اسمك؟

ارتعاشات

المشهور بيه وسط اصحابك؟ا

اصحابي المدونين بقى..ممم...رعوشه...ارتعاشه..كده يعني

عمرك؟

22

برجك؟

برج رومانتيكي من نوع خاس :)...مممم...برج الاستكوزا

مجال دراستك؟

طب..من بوئكيا راجل..الشر برّه و بعيد

شخصيتك نوعها إيه؟

انا انسان رائع...بساهم عيوبي الصدق و الامانه و اني محبوب وسط صحاابي :)..

لا متهيقلي انتم ممكن تحكموا احسن بس يعني انا بحب الضحك جداا...شخصيتي اتغيرت كتير عن زمان..للاسواء للاسف...بس يعني..

السفر بالنسبة لك؟

انا بحب اعيش بره مصر بصراحه..ن شاء الله اسافر لما اخلص دراسه و اعيش بره على طول..و هبقى اخد معايا حبة ميه من بتوع النيل يصبروني على الفراق

المود بتاعك؟

يعني ممكن ببان على طول مبسوط حتى لو كنت ببقى مضايق...بسساعات بقفل خالص يعني

وقت فراغك بتعملى فيه إيه؟

بشوف افلام وثائكيه...:)..على الجزيره والله...انترنت...مممم...بسمع موسيقى..

الاكلة المفضلة؟

ههههههههههههه...حاجات كتيير يمكن سمك اكتر حاجه

الصفات اللي أخدتها من بابا؟

شكله :)..بابا بقى طيب و هادي كده بس انا ملحقتش اخد الا شكله بصراحه :)

الصفات اللي أخدتها من ماما؟

خفةالدم..

اكتر ست حاجات بكرهها؟

الخيانه

الكدب

انعدام التقدير والذوق والاحساس

الغباء

الاستهتار

الئاوحه في الغلط

اكتر ست حاجات بحبها؟

منظر البحر وقت الغروب

صوت الموسيقى الهاديه والدنيا مضلمه شويه

بيانو مع اني مبعرفش اعزف

ريحة الفل

قعدتي مع حبيبتشي :)

احساس الاخلاص والتضحيه

الشغل بالنسبة لك؟

حياتشي كلها هو لمستقبل و الماضي ولحاضر

الانترنت بالنسبه لك؟

مهم جدا .. مينفعش اعيش من غيره .. لما النت بتقطع ببقى هتجنن

الله يمسيكي بالخير لا انا هجبلك اخويا ياخد تاجات من عندك اجاباتشكماشيهاخر حلاوه :)

امرره لمين؟

نوني

نور دواير

شيماء تخاريف في اول بريك من المذاكره

روح

احنا

ايميلي

عبير

بريك

ملوش اكشاك

!انطق
اتكلم!
في ايه؟!
مالك؟!
لا عارف تعبر
ولا عارف تقول
ايه هي امالك!
ساكت
و كابت
جواك احلامك!
عشانّك جبان؟
عشانّك مستني
يجيك الامان؟
ولا عشان
خيبتك قدامك!!!

بشوفك محبط
بشوفك خايب
بشوفك تايه
بشوفك عايب
طب اشوفك مرّه
من كل ده تايب!!!!!

بس عشان
للحلم ضرايب
ضريبه سهر
ضريبة تعب
ضريبة دعوه
من كل الحبايب
بس خد بالك
الحلم
مفهوش
معلش اتحقق
اصل احنا قرايب!!!

قوم اتحرك
وبلاش يوم
الاقيك تتبرّك
ب اللي لا نفعك
ولا يوم ضرّك

حلمك اهو
شايفه معاك
عايزك تصرخ
انا كلي فداك
لازم تسعى
مش هو هواك؟!
ولا القاك
قاعد مستني
بتبكي و متمني
يجي لعندك
شايله ملاك
او حتى يجيك
من شباك!!

بقولك يابني
متبقاش شكّاك
لو متعبتش
حلمك دوة
ملوش اكشاك
ملوش اكشاك

هو لسه ممكن ؟ 2

هو لسه ممكن يكون في امل يا جماعه؟.... لسه في امل في اي حاجه؟...مش عايزاجابه متسرعه ايوه فيييييييييي من حد متحمس وكلام زي لو بطلنا نحلم نموت....الحلم غير الامل يا ناس....ولا عايز اجابه متسرعه من حد يائس لا مفيش امل...و هنعمل ايه و ما ب اليد حيله .... لسه ممكن يكون في امل بعد كل اللي احنا شايفينه ده.... لسه في امل في انك تقعدتذاكر تذاكر تذاكر و تتعب نفسك وانت بتحلم بحاجه مع انك في الاخر عارف انكمش هتاخد الا البواقي.... لسه ممكن تشتغل وتصلح وتحلم بعيشه احسن وانت عارف ان في مليون واحد بيهد اللي بتعمله من غير قصد عشان جاهل او بقصد عشان هوعايزك تفضل في اللي انت فيه... لسه ممكن يكون في امل انك تشوف ناس غير الناس...تعامل تاني و ظروف تانيه مع انك كل يوم بتشوفهم بما فيهم انت من سيء لاسوء...
ولا نقعد نبص على قصص النجاح و نقول اه ممكن اهو و ده الدليل و شوف فلان وشوف علان ما انت برضه هتلاقي اللي يقولك ده واحد في 70مليون هتقول لا اهو ادي مليون مثال هيقولك ماهو في 70 تانين منجحوش..هتقوله ايه؟ يا جماعه انا عارف ان الامل في ربنا كبير و مبينقطعش و ربنا قادر على كل شيء بس ربنا مش هيغير حاجه الا لما احنا نتغير... و عشان احنا نتغير طبعا الجمله المشهوره لو كل واحد بدأ بنفسه....بس يا جماعه لو دي تفتح عمل الشيطان...لو ديه معناها اننا كلنا لازم نشتغل...كلنا نفسنا في حاجات احسن بس مش كلنا هنشتغل.... لو انا اشتغلت و مغيرتش حاجه وفضلت كل حاجه زي ما هي يبقى انا ذنبي ايه.... ذنبي ايه ما انا ابتديت و مخدتش حاجه..تعبت و غيري كان مرتاح... انا اشيل وزره ليه............

ديه يا جماعه دعوه للتفكيرمش للتكفير...انا مش يائس انا بس بفكر....

ولا انتم ايه رأيكم

كل اللي له بدايه له نهايه

بس انت بص في مرايه

هتلاقي كل شيء مكتوب

هتلاقي كل شيء واضح

متغميش عنيك تاني

ده اللي رماك بالنار

قبلك رماني

ارجوك فكر شويه

هو العمر كام ثانيه

كلها احلام بتروح

كلها احلام فانيه

تمشي في طريقك مبسوط

تلاقي

وحوش خارجه مالبيوت

بتعوي

زي ديابه سعرانه

بتنهش فيك يا كتكوت

لا هتعرف تزؤ ولا تقول

ياريتك يس تجري على طول

تهرب

قبل الوقت ما يعدي

وتصبح

بالهموم مشلول

يا اخوانا شفت العذاب الوان

بس المره دي مالموت قلقان

شايف قدامي من الهموم فدان

ارجوكم

غطوني..غموني..دفوني

لاموت بردان

كل مره احس حاجه بتنكسر

اصرخ بلاش..

قلبي هينفطر

لو كل حاجه ضاعت..انا الغلطان

انا اللي سبت وهمي

لحد ما كبر

كل اللي له بدايه له نهايه

بس انت بص في مرايه

هتلاقي كل شيء مكتوب

هتلاقي كل شيء واضح

هو لسه ممكن؟

لسه ممكن تواجه كل الناس بطريقتك و شخصيتك الطبيعيه؟؟؟ انا رأي انه لا....صعب اوي..مش في الزمن ده بس...لا في كل وقت....هتلاقي ناس تحب ده...وناس متقدرش انك بتتعامل على طبيعتك... انا هنا بتكلم عن الشخصيه....صعب اني اعامل الناس كلهم بشخصيتي الحقيقيه...و متهيئلي كل الناس كده الموضوع مش مرتبط بان الواحد تكون شخصيته ضعيفه و يضطر يداريها عن الناس ورا قناع صلب..او نظره حاده اواي حاجه تخلي في حاجز بينه و بين الناس عشان ميقربوش و يعرفوا شخصيته على حقيقتها فيبتدي الاستغلال و التعامل معاه يختلف و الضغط على نقطة ضعفه خصوصا في الزمن اللي احنا فيه ده... لا ممكن كمان يكون الانسان قوي جدا و يضطر انه يكسر القوه ديه و يتعامل مع الناس بصوره هو يشوفها انها تساهل منه و ان ده ميتناسبش مع شخصيته الحقيقيه و ده برضه بيحط حواجز بينه و بين الناس عشان محدش يقرب ويعرف و ينفر منه او يحس ان اصدقائه بيتعامه معاه و هما خايفين منه... بس يا جماعه في الحالتين الموضوع مبيتظبطش...يعني بيقلب عكس في معظم الاحوال مبيقدرش يمسك العصايه من النص ده اللي بيشكل عبء نفسي رهيب عليه ...و كمان اصلا كفايه اللي بيحس بيه و هو بيداري شخصيته الحقيقيه عن الناس... يمكن لو فكرت شويه هتلاقي ان الشخص ده اخرت العذاب النفسي اللي هو فيه يا اما بيقول لا انا هعيش على طبيعتي مهما كان وده ممكن يخليه يتقوقع على نفسه في الاخر وميكنش ليه اصحاب...او بيتغير مع الوقت وبينسى شخصيته الاولانيه وده ممكن يبان للوهله الاولى انه حاجه كويسه بس لو فكرت هتلاقي ان لو كل الناس مشيت في دايرة اللتغير ديه هيبقوا في الاخر ستمبه واحده بيتعاملوا كلهم بنفس الطريقه........ ولا ايه؟

وحشتوني!!

وحشتوني ازيكم جميعا.........بجد وحشتوني كلكم.....وحشني البلوج....وحشني التواصل معاكم........ بجد سعيد اوي اني رجعت تاني و اتمنى انكم انتم كمان تكونوا مبسوطين زيي........ نبتدي كده ب شوية شعر سعيد..:)....مش هنقلبها غم من الاول...:):)

!!ايوه

أيوه

هتعلّملها جرافيكس

هعملها فيلم كارتون

هصورلها العالم

هحطها في أجمل كون

هرقصّلها العصافير

على ارق نغمة قانون

ايه؟

هتقول عليّه مجنون

مش مهم

مدام القلب حنون

طب و ليه؟

عشان

لما انام

يبقى ضميري مرتاح

اصل انتي

ملكيش ذنب في جراح

عاشت معايا سنين

كان قلبي ناقصه الحنين

كان صوتي مليه الانين

أصل انتي

لازم اعوضك

عن سنين عدت محبتكيش

مشفتكيش

مكلمتكيش

سنين عدت حبيت فيها غيرك

عشان

دورت عليكي

و ملقتكيش.....

يا رب

يا رب

زهقان وحدي طول ليلي بناجي النجوم
قلبي تعبان..حيران..ملياه الهموم
بدعي وأقول يا رب..
يا رب
يا رب انام بالي مرتاح
ولما أقوم..
القيك زحت كل الغيوم
دنا عبدك و شاكرك و عارف نعمتك
و خايف انا و الله من نقمتك...
و نفسي أعيش انا في جنتك
بس ساعدني يا رب
ساعدني
ساعد قلب وحيد مكلوم

Posted by ert3ashat at 8:03 PM 14 comments