Thursday, August 2, 2007

يوميات شراب 2



.......... اهيء اهيء.........
انا فعليا اخر ايام العز كان على باب المحل...الراجل مقدرش يصبر.!!!!!...هو خرج من باب المحل و قام ساند على الحيطه و قلع الجزمه...و....قلع الشراب القديم اللي مكنش فاضل منّه...غير ريحه و لون بنّي.....انا اتسرعت بس قلت يمكن كان جايله هديه من و هو طفل....عشان كده مقلعوش طول عمره...وقام راميه علىطول ايده وقع يا عيني على شوية قطط محطوش منطق....وقعوا في مكانهم...الله يرحمهم..بعدين لقيته انقض عليا وقام لبسني زي اي مجرم محترف على مرّه واحده.....

جوه الجزمه اتعودت مع الوقت اني اتعايش مع الكائن الاخضر ما احنا مع بعض 24 ساعه كل يوم بس بعد حوالي شهرين اكتشفت انها ورقه منسيه تقريبا ديه وصية الست الوالده الله يرحمها ...
بس الشهاده لله الراجل مكنش حارمني من حاجه الجزمه كان فيها شباكين...شباك على الارض بيجيب طراوه و شباك على الجنب بيجيب هوا و بالمره بطمن منّه على الفرده اللي على الجبهه التانيه....
المهم ان انا على ما وصلنا البيت كنت اتعلمت حاجه مهمه الا و هي ان مش كل شراب مبقع بنّي لازم يكون اداس بيه في طين..لا ممكن يكون اداس بيه في حاجه تانيه ...

لما وصلنا البيت دخلنا و حصل اللي كنت خايف منّه...وهو بيقلع الجزمه انا حسيت في صوابعه نظرة غدر..انه هيسبني...حاولت امسك في الجزمه على قد ما اقدر بس هو كان اسرع منّي......

و ابتدى يمارس حياته الطبيعيه عادي خالص و هو لابسني ....انا قلت لا بئى...اللي ناقص انه لما يجي ياكل يقلعني و يحطني فوطه على صدره ماهو مصدق لقى حتة قماش...انا كنت بقولها تريقه...بس.....بعد كده ده بقى حلم..انه بس يقلعني............

26 comments:

HaMbAcAWeY said...

hheeeeeeeeeeeeehhhhhhhhhhhh
ana awel wa7da
aktar 7aga bete3gebny fek zaka2ak fe el rabt ben fekra so3’aiara we fekra akbar bekter we heya en el sha 3b et3awed 3ala el fa2r we badal ma ya3tared 3aleh beyata3ayesh ma3ah we ya7’od 3aleh
el sokoooooooot moseba kebera

3omoman el fekra ra2e3a

smraa alnil said...

يا صباح دماغك العالية

ههههههههههههههههههههههه

بقي يا عيني حلمه انه يتقلع
طب والله انت هتخليني اول حاجة اعملها اني لما اروح بيتنا اني اقلع الشراب
طب والله العظيم صعب عليا

هههههههههههههههههه


اه بمناسبة حابي بيزي يويو

يعني هابي بيرذداي تو يو
happy birth day to you

اتفهمت ولا نفهم كمان

اتعلموها بقي

Abeer said...

الشراب ده صعبان عليا اوي

طيب احنا ممكن ننظم حملة

لبس الجزم من غير شرابات

صحيح الجزم هتشتكي بردو .. بس ساعتها يبقى يحلها ربنا
ممكن نبقى نمشي حافيين

one true thing said...

هههههههههه
ايه الدماغ دي دماغ كبتشينو
ولا ايه
بجد الفكره حلوه اوي خلتني اقرا
بوست الشرابات اللي قبله
انت فكرتني بالكرتون واحنا بنتفرج عليه
لما يمشي الولدويخرج من الاوضه ويرمي لاعبه
تلقى اللعب بتتكلم مع بعض وبتتحرك من مكانها
وكان نفسي بجد يكون الموضوع ده حقيقي
بس الحمد الله مش هأموت نفسي في حاجه
حتى الشربات طلعت بتتكلم اهي
بجد فكره حلوه اوي
تحياتي يافندم

nirfana said...

ههههههههههههههههههههههه

احساس لسه حى said...

عزيزى
عارف لو كان الرجل ده متجوز ولقاله شراب حريمى جنبه كان العيشه هانت
لاكن كده ناشفه من كل حيته
الحل الوحيد انه ياكل فى نفسه بسرعه علشان يزهق منه ويرميه
نار الشارع اهون من الذل ده
سلام

break said...

احنا لازم نلحقكوا بدرى بدرى
واحد بتعمل يوميات للكراسى وواحد بيعمل للشرابات
بس بجد الشراب صعب عليا جدا
الرفق بالشرابات يا بنى ادمين

Queen eraser said...

أوحش حاجه ان الواحد يبقى فاكر نفسه حاجه و هوه مقامه مش كده.
الشراب ده معمول مخصوص عشان يتلبس ف الرجل مش عشان نحطه على دماغنا دى نقطة.

النقطة التانيه انه أه من حقه يحلم على اعتبار انه يقدر يحلم فعلا بس يحلم ف حدود المعقول مش يتأنزح و ينقى اللى حيلبسه كمان.

معلش شرابك مرعوش و مش من حقه يختار واحد نضيف عشان يلبسه على مرتين.

فكرة كويسه قوى و مختلفه بس ممكن أفهم اشمعنى الشراب؟؟
شكرا

حصان بري said...

هههههههههههه
شراب
صباحو في العلالي
وعامل له حلقتين كمان

طيب تصدق فعلا بيتبهدلوا معانا
وبالذات في الحر ده
واحنا ياخي ولا عندنا دم

قول لي بجد؟
كنت شارب ايه وانت بتكتب الحلقتين الجامدين دول

Reemo said...

يا دماغك يا رعوشه
هو انا قلت بجد انك دماغ لوحدك
من زمان ايام يوميات السمكه اللى فى جوانتامو
ربنا يكون فى عون الشراب
تصدق صعب عليا
بس مش عارفه هو واخد الموضوع بصعوبه
ايه يعنى لما يقعده عشره خماستاشر يوم فى رجل صاحبه من غير ما يتقلع
اهو دفا برده
مش بدل التعليقه فى البرد
ولا هو بطر على النعمه

صباح الفل يارعوشه
:))

شيماء الجيزى said...

يا عينى وقع فى ايد من لا يرحم
شرابك ده يا مورسى
:d

اوعى يكون ؟؟؟؟؟؟

ولا الشباكين ...ده فى تكييف وكده بقى
الله يكون فى عون شراب الى فى بالى

مستنين الباقى

بس الله يكرمك يا عم بلاش الكتابة المتلخبطه دى
احسن انا عينى اتمققوا


سلاموز بالموز يا عم الشاعر

Hadota .. حدوتة said...

لا بجد يعنى مش ممكن
ايه المعاناة دى
الحمد لله انى مطلعتش شراب


اتارى الشرابات بتعانى واحنا مش عارفين
ههههههههههههه
حلو اوى البوست بيضحك من الاول للاخر
:)
تحياتى

catroz said...

اقطع دراعى ان ما كنتش سبت كومينت هنا قبل كده
هو طار راح فين
ولا انت اللى طيرته
بطل لعب فى البلوج بقى
و متطيرش الكومينتس
:d

انت كده على فكره هتخلينى اقعد اكلم الشراب كل مره قبل ما البسه

:D

Ert3ashat said...

همبكاوي
انا كمان فرحان انك اول واحده
هاهاهاههاهاههاهاههه

تحليلك جمي والله يمكن طلعت مني عفويه بس بجد تنطبق عليها الفكره ديه

نورتيني بجد :)

Ert3ashat said...

سمراء:
هاهاهاههاهاهاهاا
ده الطبيعي انه يتقلع ولا ايه؟
هاههههاهااا

لا خلاص فخيمتو :)

Ert3ashat said...

عبير:
هاهاهاههاا
عندك حق :) و نعمل يوميات برضه :)

نوريني

Ert3ashat said...

وان ترو ثينج:
ايوه انا كمان كان نفسي تبقى حقيقه :)

بجد اسعدني مرورك:)
نورتيني

Ert3ashat said...

نيرفانا
سعيد اني اسعدتك

Ert3ashat said...

احساس لسه حي:
عندك حق والله :)

احنا نجوزه و خلاص :)

Ert3ashat said...

بريك:
بريك اللي زعلانه من اخر قصيده :)

عموما هنرفق بالشراب يمكن صاحبه يتوب :)

Ert3ashat said...

دكتوره اسرار :
:)
جميل الكومنت :)
انا حاسس انك مضايقه بس مش عارف ليه :)
بصي يا ستي اشمعنى الشراب ف انا لو كتبت عن امندي كانت هتبقى نفس المعاناه و كان هيبقى سؤالك اشمعنى المنديل

بالنسبه للحلم فهو شراب و بيتبس فبيحلم ان اي يلبسه يبقى نضيف و ده حقه زي ما انتي بتحمي تتجوزي انسان كويس ماهو في الاخر كده كده جواز بس اكيد هيبقى نفسك في الاحسن :)
و ماله شراب مرعوش :) الرعشه حرام ولا ايه :)

بجد نورتيني

Ert3ashat said...

حصان بري:
شاري ميه :)

والله بيشوفوا اوييييييييل :)

نورتني

Ert3ashat said...

ؤيمو:
صباح اانوار :)

نورتيني

قليه :) ما مكنتش عجباه التعليقه في البرد :)

Ert3ashat said...

شيماء:
ازيك؟:)

ماشي يا ستي :) مش شرابي يا بيه :)

نورتيني

Ert3ashat said...

حدوته:
انا بجد مبسوط اني اسعدتك :)

نورتيني والله :)

Ert3ashat said...

كاتروووووووز:
والله ما لعبت
هو اللي ار لوحده ده انا حتى مشفتوش :)

اوعي تكلميه قدام الناس بس :)

نورتيني