Tuesday, July 3, 2007

هو لسه ممكن؟



لسه ممكن تواجه كل الناس بطريقتك و شخصيتك الطبيعيه؟؟؟ انا رأي انه لا....صعب اوي..مش في الزمن ده بس...لا في كل وقت....هتلاقي ناس تحب ده...وناس متقدرش انك بتتعامل على طبيعتك... انا هنا بتكلم عن الشخصيه....صعب اني اعامل الناس كلهم بشخصيتي الحقيقيه...و متهيئلي كل الناس كده الموضوع مش مرتبط بان الواحد تكون شخصيته ضعيفه و يضطر يداريها عن الناس ورا قناع صلب..او نظره حاده اواي حاجه تخلي في حاجز بينه و بين الناس عشان ميقربوش و يعرفوا شخصيته على حقيقتها فيبتدي الاستغلال و التعامل معاه يختلف و الضغط على نقطة ضعفه خصوصا في الزمن اللي احنا فيه ده... لا ممكن كمان يكون الانسان قوي جدا و يضطر انه يكسر القوه ديه و يتعامل مع الناس بصوره هو يشوفها انها تساهل منه و ان ده ميتناسبش مع شخصيته الحقيقيه و ده برضه بيحط حواجز بينه و بين الناس عشان محدش يقرب ويعرف و ينفر منه او يحس ان اصدقائه بيتعامه معاه و هما خايفين منه... بس يا جماعه في الحالتين الموضوع مبيتظبطش...يعني بيقلب عكس في معظم الاحوال مبيقدرش يمسك العصايه من النص ده اللي بيشكل عبء نفسي رهيب عليه ...و كمان اصلا كفايه اللي بيحس بيه و هو بيداري شخصيته الحقيقيه عن الناس... يمكن لو فكرت شويه هتلاقي ان الشخص ده اخرت العذاب النفسي اللي هو فيه يا اما بيقول لا انا هعيش على طبيعتي مهما كان وده ممكن يخليه يتقوقع على نفسه في الاخر وميكنش ليه اصحاب...او بيتغير مع الوقت وبينسى شخصيته الاولانيه وده ممكن يبان للوهله الاولى انه حاجه كويسه بس لو فكرت هتلاقي ان لو كل الناس مشيت في دايرة اللتغير ديه هيبقوا في الاخر ستمبه واحده بيتعاملوا كلهم بنفس الطريقه........ ولا ايه؟

27 comments:

break said...

اولا حلوة كلمة ستمبة دى اوى
متجيش ف بال حد بسهولة
ثانيا
اانا شخصيا اعتقد ان التغيير فى الشخصية بينفر اللى اودامك منك
يعنى لما اجى اقول على شخص ميزة
اقول داعلى طبيعته اوى وبتبئا حاجة حلوة
شخص تانى بئول دا مفتعل او مش على طبيعته ودى مش حاجة حلوة
اغلب الناس مش راضية على حالها


تحياتى

كراكيب عادل said...

اولا اية الغيبة دي ؟؟؟؟؟؟

ثانيا برضو لية الغيبة دي ؟؟

ثالثا ورابعا وخامسا ووووو

فرحت لما شوفت التعليق عندي برجوعك

التعامل مع الناس فن

علم

زوق

رقي

كل حاجة لان كل واحد مختلف عن التاني

بس اكيد فية حجات كتير جدااا بتفضل ثابتة في تعاملنا الخلق بكل تشعباتة

عامل الناس بخلق حسن

Reemo said...

حمدالله على السلامه يا رعوشه
ليك وحشه كبيره
اوعى تمشى تانى بقى
ولو قررت تاخد اجازه مش تقفل البلوج خليه موجود علشان لو حد عايز يتطمن عليك
مبسوطه اوى انك رجعت
حمدالله على سلامتك
(^_^)

emos said...

shooof ya 2ebny

fe ba3d el nas fe 7ayah el 2ensan mesh beye3raf yet3amel ma3ahom b sha7'seyeto el tabe3eyya. howa mesh beyet3amel ma3ahom keda la2enno shayef en mesh dah el 2eslob el moree7 ma3ahom

bs still fe nas belnesbalo howa beyata3amal ma3ahom b sha7'seyeto el tabe3eyya w 2ella makansh el wa7ed 3ando best friend w antee7' wel 7agat deh. kol ensan fel donia beye3raf shewayet nas beyerta7lohom w ma3ana beyerta7lohom or byerta7 ma3ahom enno mesh bayafta3el 7aga beyata3amal 3ala tabe3to 7'ales w howwa 3agebhom keda.

bs ma3na en fe nas bey3amelhom b 2eslobhom fa dah kewayes kedan w mesh 3eeb
bel3aks dah zaka2 w dah sa7 100% el abne2adam lazem yekon leh 3elakat. w howa dah el ta3ayosh wel takayof ma3 el 7ayah

lamo2a7'za tawelt
enta kont feen?

Noony said...

قصدك يعني الواحد يبقى عنده انفصام في الشخصية؟
يعني يتعامل مع عيلته غير مع اصحابه غير في الكلية غير في النادي وهكذا؟

لو قصدك كدة أنا أكبر منفصمة في الدنيا...ومعتقدتش إن حد منهم عارف مين فيهم كلهم

بس في رأيي المتواضع إن الحال دةأحسن من إني أفضل حاجة واحدة والآخر يتقبلني كدة...كدة محدش هيتقبل التاني أبداً لو كل المجتمع فكر بالأسلوب دة

تعرف شعرة معاوية؟
بس خلاص...هي دي الحل

مش كدة ولا ايييييييييييييييييييييه؟
:)
نوني

تخاريف said...

بص يا دوك...

من الاخر كده...يسرااا قالتها كلمه...الطبيعي يكسب...
يعنى احسن حاجه انك تتعامل مع الناس على طبيعتك...عشان تبقى براحتك فى المعامله...
تقبلووو هما الوضع وتفهموه...يبقى خير وبركه...
مافهموش ..وابتدوو يستغلوا المسأله او يفهمووو غلط ..يبقى هما اللى حطو حدود فى المعامله ..وساعتها عليك انك تحترم حدودهم د
ى...
لكن الاسااااااااس ..انك تتعامل على طبيعتك...
مش عشان حد...
عشان نفسك اولا واخيرا...
ماتبقاش حاسس ان فى لود عليك ..فى انك تتجمل وتحاول تبان فى اجمل الصور...

الكلام نوعان :كلام فارغ وكلام مليان كلام فارغ said...

خاطبوا الناس على قدر عقولهم
يعنى احنا كتير اوى بنقابل ناس وبنتعامل معاهم على اساس عقلنا احنا وده غلط
لازم الانسان يكون له 70 مليون شخصيه عشان يعرف يتعامل مع ال 70 مليون اللى عايش معاهم
مش كده ولا ايه؟

عين ضيقة said...

كونى كما انت

انا شايفة ان الواحد لازم يكون طبيعى جدا واللى يقبله كده يقبله واللى يرفضه يرفضه
احنا مش هنصاحب كل الدنيا
وده ما يمنعش اننا نتعلم التعامل الجيد مع الناس لأن ديننا بيقول كده


سلام كتير

The Groom said...


شوف يا حبي

ممكن تواجه الناس بطبيعتك بشرط ألا تخجل منها وتحاول اصلاحها

ولازم نتغير للأحسن وده مش حيحصل مية في المية وده برضو اللي بيفسر الاختلاف

:)

ابقى سلم عليا لو فهمت حاجة

تحياتي لك من ماناساس البلد

صاحب البوابــة said...

حمدا لله على سلامتك

التدوين نور من تانى

تحياتي

Rivendell** said...

فاهمه كلامك وحساه تماما
عديت في الصراع دا وبعدي فيه كل يوم
لكن انا من الناس اللي نسيوا هما مين فعلا
كنت باخبي العبط والهبل والسزاجة الزايدة عن الحد
ماعرفش اتغيرت بجد ولا تعود عالوضع الجديد ونسيان
المهم اني دلوقتي بحاول ارجعني تاني يمكن بحقائق مختلفة لكن المهم انها انا مية في المية من غير ماخبي حاجة
لو ما عشتش مرتاح مع نفسك عمرك ما هترتاح ولو عندك مليون صديق
ودا رايي

hurricane_x said...

u can't be urslf all the time. Simply, it won't work!
weba3deen 2elmawdoo3 dah 3aknanah a'7er 7aga besara7ah :/

Lama said...

صعب اوي الواحد يتعامل بطبيعته وتلقائيه ادام حد ممكن يخدها عليه
وبردو وحش اوي لما الواحد يتعامل بطريقه مصطنعه ولف ودوران عشان اللي ادامه
بس برغم كده غبي اوي كمان اللي بيتعامل على طبيعته مع اي حد

انا واحده كنت الاول بتعامل بطبيعتي زي مبتعامل مع اخواتي وصحابي نفس الطريقه اي حد بره ولد او بنت
بس بحاول افهم اللي ادامي عشان اعرف اتعامل معاه صح

زكي اوي اللي بيتعامل بطبيعته كاساس فعلاقاته مع الناس لانه واحد بيتمسك بنفسه مهما كان بس بردو يكون فكره يقظ ويفهم كلامه المفروض يجي امتى وباسلوب مباشر او مش

يعني مش كل الناس زي بعضها ممكن واحد يتعامل معاك وتحس انه بينافق ويفشر ويلف ويدور ويحور كلام لمجرد انه مش عايزك تعرف حاجه معينه
وممكن بردو واحد تاني تحس انه على طبيعته وكلامه مباشر معاك


وتلخيص لكلامي يعني انا بالنسبه ليا بفضل ان الواحد يكون على طبيعته كاساس بس مش لدرجه ان اللي ادامه يقول عليه طيب اوي او عبيط

لان لو كله اتعامل بنفاق ومصالح هيبقى كله مش طايق بعضه وتشك في اي حد ادامك

Ert3ashat said...

break:
كلامك صح بصراحه
بس مش لازم هينفر منك ده ساعات بيبقى مبسوط لالنك بتعامله بطريقته
بتريحه من الاخر :)
اشكرك على زيارتك

Ert3ashat said...

عادل:
معلش يل حبيبي ظروف والله
انا كمان فرحت بتعليقك وكلامك صح اويي

Ert3ashat said...

ريموو:
حاضر يا ريمو خلاص ديه كانت اخر مره
اشكرك بجد على تعليقك و اهتمامك

Ert3ashat said...

ايموس:
انا كنت في ظروف شويه والحمدلله عدت
فعلا ذكاء بس هو الخوف لو ده اتطبق على كللللللل الناس هل فعلا هيخليهم زي بعض

Ert3ashat said...

نووووونييي:
لا يا نووني لا انفصام ولا حاجه
دول شوية برد :)
كلامك صح بس مش كل الناس بتلاقي الشعره
ولو لقتها ممكن متحافظش عليها

Ert3ashat said...

تخاااااااااريف:
في امل في النسا اكيد متقلقيش :)
بالنسبه للكلام لا انا اختلف شويه عشان لو قلت اللي مش عاجبه يروح يمكنت الاقي واحد بس اللي معايا
انا معاكي ان ده الكويسش وكده بس محدش يقدر يعيش كده

Ert3ashat said...

كلام نوعان:
اشكرك على زيارتك لي بجد
فعلا واله ده الحل للاسف

Ert3ashat said...

عين ضيقه:
نفس ردي على كلام دكتوره تخاريف

Ert3ashat said...

جروووم:
منور يا حبيبي
لا فهمك وده حل كويس اويي

Ert3ashat said...

البوابه:
الله يسلمك يا عسل

Ert3ashat said...

ريفا:
كلامك ح وربنا يعينك عليه و ابقي احكيلنا

Ert3ashat said...

هوريكان:
ولا يهمك :)
منور

Ert3ashat said...

لما:
انتي جبتي من الاخر والله :)
احيييكيييي

dr_diamond86 said...

أولا حمدالله ع السلامة و ويلكم باك ومتكررهاش تانى ان شاء الله ايا كانت الظروف
ثانيا لا مفتكرش ان الانسان ممكن يعيش على طبيعته اوى يمكن كمان علشان انا مقتنعه ان الانسان اصلا عنده تعدد شخصيات
غصب عنك بتتعامل مع كل انسان باسلوب مختلف
مع عيلتك انت واحد مع صاحبك الانتيم انت واحد مع زميلك انت واحد تالت ومع واحد قابلته ف الاتوبيس وانت مسافر انت واحد رابع
غصب عننا بنضطر اننا نراعى حاجات واحنا بنتعامل مع الناس حتى اقرب الناس لينا
بتنحسب كلامنا وتصرفاتنا وغصب عننا بنحط مشاعرنا وتلقائيتنا اندر كنترول علشان كده معدش فيه طبيعي ولا عاد فيه تلقائية
بس حتى ف كل ده بيفضل لكل واحد فينا بصمة مهما حاول يرسم نفسه اكيد طبيعته بتغلبه حتى لو للحظة