Saturday, August 18, 2007

أنا مغمض


أنا مغمض
خلاص
مبقتش عايز اشوف الظلم قدامي
لو حتى ضيعت ايامي
مانيش مفتح!!

و مانيش هفتح
مش عايز اشوف نظرة امل فيا
لو كان عليا
كنت سبتكو من زمان و نسيت اللي كان

و اترحمت من عدابي اللي فاض بيا

يفيد ب ايه تقولوا لدموعكو عنواني

ده دموعكو في صحياني رعباني
و من نومتي وخداني

خدوها...خدوها ارجوكو من تاني

أنا مغمض

قافل على نفسي بجفوني
لو ينبكوم فيا ثواب
بضحكتكو دفوني
متسبوش العجز يملاني
ارحموني!!
ده انا جوايا حزن رباني
و اللي رباني
ما زرع جوايا.. اي اماني
سابني في دنيا لا بترحم
ولا بتسيب اللي يرحم
ولا اللي لسه قلبه انساني
ف انساني
و سيب الوقت ينساني
و حوشوا عيونكو اللي لمساني
خليكو زي دنيتكو...
سيباني


اعدوروني لانشغالي مره تانه بجد هرد على التعليقات في اقرب فرصه

15 comments:

تخاريف خاصه! said...

بجد بجد ماشاء الله عليك يابنى...
من اروع ماكتبت ..بجد فعلا....


يعنى بالرغم من كونه كئيب..وده بقى عادى بالنسبه لحضرتك"بهزر يا دوك
:)
الا ان فعلا كلماته روعه ..تفوقت على نفسها فعلا فى التعبير عن الحاله
يعنى كل كلمه فيه محسوسه جدا..ولمستنى اوى....

بجد يا ارتعاشه راااائع بجد...



و حوشوا عيونكو اللي لمساني



خليكو زي دنيتكو...
سيباني


انا اول لما قريت الكلمتين دول...اتأثرت اوى..ودمعت...

الخيط الرفيع said...

ايه يا ارتعاشات يعني اغيب ولما اجي اسلم القيك مغمض عنيك
وكمان مقفش وزعلان
بص يا ابني انا هقولك كلام يمكن تحسه بعيدشويه
بس انا عيزة اقوله
لو حاجة زعلتك أزعل بكل ما تحمله الكلمة من معاني
لكن اعرف امتي تفرمل الزعل وتعمل ريفرش مفيش حاجة تستاهل تأكلك في سكتها
اسفة علي التأخير

Noony said...

عجزت كدة ليه؟
انت لسة صغير على التفكير دة والحزن واليأس دة كله

هو كئيب بجد...ودة معناه انك عرفت توصل المعنى صح
رااااائع

بس كفاية حزن بقى وندخل على الفرح شوية؟
مفيش حاجة في الدنيا دي كلها مستاهلة

أه صحيح
سابني في دنيا لا بترحم
ولا بتسيب اللي يرحم

الجملة دي غلط...الرحمة من عند الله وحده ومحدش يقدر يمنع رحمة ربنا عنا..خد بالك بعد كدة منها

متغيبش كتير يا دوك
:)
نووووووني

حواء said...

انت عامل فى نفسك كدة ليه ؟؟ حتى لو غمضت عينيك حتشوف الظلم طالما بتفكر فيه وشاغل بالك به .. حاول تشوف الحاجة الحلوة اللى فى دنيتك .. تحياتى

hamdool said...

إحنا معاك ومش حنسيبك


ده لو كنت عايزنا طبعا

happy 2 read ur words :)




hamdool/ Kuwait

klmat said...

كلام جميل جدا
وحزين اوى
واضح انك انسان حساس جدا
ومهموم بكل من حولك
بس الواحد
لما يفتح عينيه ويشوف
لحظه الشروق والغروب
والسما والبحر
وزى ما فى ليل
فى نهار
بيشوف قدره ربنا
اسمه العدل
مسير الحال بتصلح
حاول ان لاتستسلم لاحزانك
بس كلامك مؤثر
فوق ما تتخيل
انت شاعر كبير
تحياتلى لك

Hopiz said...

حاساه عبير صادق
محاولة جيدة للحزن
عجبنى قوى الجمله دى
(ده انا جوايا حزن رباني
و اللي رباني
ما زرع جوايا.. اي اماني
)
لخض معاناه الشباب المصرى فى كلمين
حستهم قوى
بس اعتقد ان الاصل ان الواحد بيتولد بالفرح و الحزن سوا
لكن قلة الامانى هى الى ممكن تموت الفرح و تقوى الحزن

kahramana said...

حلو اوى اوى البوست

بس حسة ان فيه نوع من انواع اليأس او الاستسلام

المفروض انالانسان يخلق لنفسه الحياة اللى هو عايز يعيشها و يقاوم فيها اى نوع من انواع الحزن او القسوة

و وانه ةيخل لنفسه الهدف و الامنية اللى هيعيش عشانها و هى ده اللى ممكن تهون عليه اى صعوبة فى الحياة

catroz said...

جميييييييييييل اوى
و احساسها حلو اوى
و حزينه
و كئيبه
و نكديه
و انا مش ناقصه نكد
سيبك من ده يا ابنى
مين اللى مزعلك بس قولى و انا اخلص لك عليه
;)

لا انت مش هتغمش عينيك
و اديك اهو فايق و صاحى و شايف الظلم
هتسيبه كده !!
لالا
دا مش انت
مش هتغمض عينيك ولا هتسيب الظلم
هتحاول على الاقل تبقى ضده
....:)

بوست راااااااااااائع بجد

:)

Halawa said...

اللللللللللله

النهاية رائعة متضفرة بشكل حرفي رائع بجد
وتناول ألفاظ لذيذة

لأ بجد معدية
بجد لازم آجي هنا علطوووووووووول


تحياتي

break said...

حلوة اوى اوى اوى
يعنى هوا كئيب بس جميل اوى اوى بجد
كلمات روعة و احساس عالى
بس يارب متكونش انت مكتئب فعلا !
لسة بدرى يا ابنى انت صغير على التفكير ده
بكرة لما توصل ل سنى هتفهم الحاجات دى :D
متزعلش نفسك
وشاور انت بس واحنا نقضى على اللى مزعلينك

زى الهوا said...

حلو اوى بس ليه كا كمية الكآبة دى , مش عارفة ليه مش حاسة إن الدنيا فيها كل الظلم دا , وحتى لو فيها حاول تتفاءل وماتبصلهاش من الناحية دى , تلاشى الحزن وحاول تفرح , بس بجد كلمات جامدة اوى وبتوجع بجد

حبيبة الرحمن said...

أنا مغمض
قافل على نفسي بجفوني
لو ينبكوم فيا ثواب
بضحكتكو دفوني
متسبوش العجز يملاني

ههههههههههههههههههههههههههههههههههههههههههههه

اظن كده انا اخدت ثواب كبير وبقت الدنيا حر كمان

جميله اوى واحساسها عالى وتناسق كلماتها جميل بس اللى مضايقنى ان هى بتنم عم حاله مش كويسه للشخص

اتمنى يكون تاليفها مش حالتك وربنا يهون على صاحب هذه الحاله ...امييييين

حنين و حنان said...

اد ايه كلامك جميل انا بحب الشعر و
ياريت تزورني و تقول لي رايك في اشعاري
http://a7asessha3er.blogspot.com/

shimy said...

يخرب بيت كده.
ايه يابنى كميه المشاعر الجامده دى.
احساس فظيييييييييييييييييع.
انا والله مش عارفه اقولك ايه بعد الى قريته غير انك كتله احساس ماسكه ورقه وقلم وبتكتب واحنا لما يتنقلنا الاحساس ده بنعيشه اوى اوى.
انا بحكم على الكتابه انها حلوة ولا لا لما بلاقيها لمست احساسى وانت كتاباتك كلها انا عشت فيها بجد.
برافو هانى