Wednesday, September 12, 2007

CarTOOON

انا بحب الكارتون..ايوه...و فيها ايه....اي نعم كبرت شويه...بس لسه بحب الكارتون جدااااا...و ممكن اقعد اتفرج عليه و مزهقش منه خالص....
انا فاكر زمان لما كنت صغير...كنت بقعد استنى الكارتون لما يجي...كان بيجي نص ساعه كده من 4 الى 4 ونص و كنت ناقص ادمع و هو بيخلص...
حاجات كتير و معاني كتير اتشكلت في حياتي من الكارتون ده...كان بيجي كارتون اسمه ليدي...بنت كده صغيره شعرها اصفر و رقيقه كده و ضعيفه و بما اني اول بنت شفتها كنت وصلت اولى اعدادي فديه كانت الصوره الوحيده للبنت اللي انا اعرفها....و اللي ممكن تلفت نظري لحد دلوقتي....
افتكر كمان كارتون بنك بانثر....ده هما مثلا بتاع 20 حلقه فضلوا يتعادوا على مدار 10 سنين و كنت على طول بشوفهم...كان ده الكارتون المفضل....و المحقق العجيب اللي معاه...كمان افتكر توم جيري بس ده كان تخصص اخويا بس لسه بحبه اوي برضه و متابعه...
كان في بقى كارتون عجيب كده شبه تصوير بتاع توم جيري بس بتاع ضفادع ساعات و ساعات ولد صغير كده بس ده مكنتش بحبه اوي بصراحه
كان في كمان بتاعه كده اسمها مغامرات سنان....و الليث الابيض....عدنان و لينا.....اللي بيقعد يفتح في بقه كده ب ايديه معرفش حد فيكم شافها ولا لا...
كمان زينه و نحول.....و اليعسوب صاحبهم....انا كنت بحب النحله التخينه شويه....بتعاطف معاها....:)))))))))....و التانيه ديه كانت عنيها مقفله علىطول.....كان في كارتون بيجي بيقولوا فيه "14 رجل من اجل صندوق"هاهاهاهاها انا فاكر الصوت لحد دلوقتي...مكن كان اسمه جزيرة الكنز....
طبعا كابتن ماجد...و الكاميرا و هي بتجيب اللي قاعدين في الاستاد واحد واحد و الناس اللي قدام التلفزيون و الناس اللي في الشارع و الناس اللي ملهاش دعوه و انا ساعات كنت بحس اني هطلع في التلفزيون بالمره ...و طبعا كل ده و ماجد بيشوط الكوره و كلنا عارفين ان رعد هينط يجيبها في الاخر...و الاخوان شوقي...و مازن الطيب...و ياسين بتاع الشوطه المزدووجه...و بسام العنيف......
كان اي مسلسل بيجي على قد حلقاته و بتبقى اخر حلقه ديه حزينه اوي عشان ببقى خايف المسلسل اللي هيجي بعده يكون مش حلو و حياتي تتعكر لوقت طويل

كانت القناه التانيه بقى بتعرض برضه حاجات بس ب الانجليزي مكنتش بتشدني اوي بس افتكر منها النينجا و بيونك سيكس....اخويا كان متابع اكتر مني....
مشيت الايام و دخل الدش و كنا الاول بنلقط قناة كارتون نيتورك و كانت بتجيب فلنستون....و كارتون تاني كده بتاع ناس من العصر الحجري....ديه كانت اكتر حاجات بتشدني...مكنتش بحب الكارتون بتاع الكلب ده اللي بيقول"يابا دبا دوووووووووو" كنت بستغلسوا اوي.....
كنت لما باجي مصر بتفقع بقى من الكارتون اللي هنا ده بحس ان مرارتي هتفرقع...و تيتى ساميه و دبدوبه التخينه و عروستي و سلسلة البرامج ديه...ده حتى الكارتون العدل اللي كانوا بيجيبوا كان في واحده كده تقعد تعلق عليه بصوتها لدرجة اني ببقى خلاص هقوم اخنق التلفزيون عشان اصلا الكارتون مش محتاج...الحسنه الوحيده اللي افتكرها كان جرين دايزر و كان بيجي قبل المغرب كده و البنت اللي معاه ديه اللي معاها اسلحه عجيبه كده في اماكن اعجب...:)))))))))) ههههههههههه....
يلا كفايه كده نكمل المره اللي جايه :)
كل سنه و انتم طيبين و رمضان كريم علينا كلنا ان شاء الله و افتكروني في دعائكم

19 comments:

bani-adam said...

ياااااااااااااه
بجد كانت ايام
انت فكرتني بايام زمان
كان فيه كمان مازنجر و كان فيه مسلسل كده بتاع ايمان الطوخي اسمه اظن كوكي كا.
البنت اللي بتقول عليها دي بقي اظن انها افروديت في مازنجر مش جريندايزر,عشان برده نبقي محددين يعني.
بس بجد فكرتني بالذي مضي,كل سنه و انت طيب بقي و رمضان كريم.

Mr.Shad. said...

ana mesh batfarag 3ala kartoon 3'er le tom w jery.. w pink banthar :)
w 2a7san 7aga..lama tefteker 2ayamak el7elwa...bas ana 2asasan mesh la2e 7aga 2aftekerha..ana kole 3ala ba3de 12 sana
w 2atmana tezor blogna
" www.feelingsclub.blogspot.com "

Ahmed Mohamed said...

بص كل برامج الكارتون والاطفال بتفرج عليهم وبسمعهم من اول توم وجيري لحد ابله فاضيله
ولسه طبعا بشوفهم وبسمعها
ما انا مهما كبرت صغير
وكل سنه وانت طيب

Noony said...

ايوة كدة الكلام المتين اللي ياكل معانا
ذكريات الطفولة الجميلة السعيدة
ما أحلى الكرتون
أنا بموووووووت في حاجة اسمها كرتون
عشقي الأول والآخير
البنت دي كان اسمها أفروديت وكانت مع مازنجر مش جرين دايزر
أنا للاسف مش عارفة ليدي
بس أعرف الليث الأبيض ودة اللي اتعمل منه الأسد الملك بتاع ديزني وكان في قضايا ومحاكم بين اليابان وديزني عشان أخده منهم القصة من غير ما يقولوا لهم
وكان فيه كمان جونجر لو تفتكره..كان كميلة اوي..مكنش عنده أسلحة ولا حاجة هو كان بيضرب بس..بس كان سكرة خالص
وبحب كمان كرتون ماجد(دايماً متواجد) لغاية دلوقتي عندي شرايط الكرتون بتاعتي--الكنز بتاعي
ذكريات كتير كلها احلى من بعضها
جميلة أوي يا رعوشة
ربنا يكرمك يا رب...رمضان كريييييييييييم

Noony said...

انت ليه كاتب
Car
بعدين
TOOON?

سؤال ليس yb
:)
نوني

حواء said...

رمضان كريم اجيلك بعدين بقى

sa'7so'7te said...

kan feh karton esmo ra3d el3emlak
7ad ye3rafo?
asl elkarton da besababo 7ara2t barraden shay

kol sana ento tayyeben

تخاريف خاصه! said...

:)

فين ايام كابتن ماجد....!!!
ده كان فتى احلامى لحد فتره قريبه...
:D
كل سنه وانت طيب يا دوك..والسنه الجايه تكون فى احسن حال يارب

كراكيب عادل said...

كل سنة وانت طيب

حسن مشالي said...

كل عام وانت بخير

انت لمست جوايا
منطقة الواحد بيتردد انه
يتكلم عنها
برافو عليك
يا اجدع ولد

Eric Matt said...


هاهاها أفروديت؟ صباح التهييس

بس والله فكرتني بأيام زمان نفس الحنين الجارف للحاجات دي

ربنا يكرمك يا رب

وكل عام وانت بخير وتحياتي لك من ماناساس البلد

Halawa said...

ياه
.انت كنت في السعودية ولا ايه؟

شفت ده كله وبحبه بجد

وكنت بحس لما بآجي مصر ان العيال اللي بيخاطبوهم معوقييييييييييين

ههههههههههههههههههه
مماما سامية والخزعبلات دي


في حاجة مش عارف شفتها ولا أه
كانت رائعة
اسمها سالي
قصة فكتور هوجو
وعاملينها للأطفال
قيم ايه وأخلاق
البيت كله كان بيشوفها دراما
أقوى من ليدي كمااااااااااان

يلا خير كل سنة وانت طيب

ياقوت الأزهري said...

الحياة العملية شبيهة بالكرتون
تتفرج على الفلم مندول ويعجبك أوى
وانت فى عز المتعة ييجى بابا يأفل التليفزيون

وبرده الدنيا كدة فى عز ما انت فيهاشغال فجأة
تتعب أو تكبر فى السن او بع الشر ييجى الموت
فلازم نتعظ بجد من كل حاجة بتقابلنا
فى هذه الحياة

أحييك
وكل سنة وانتى طيبة

والسلام عليكم ورحمة الله وبركاته

catroz said...

ياااااااااااااه الكارتووون
كنت بتابعه و بحبه و حاجات رهيبه كده
و كابتن ماجد و كونان و ريمى و عهد الاصدقاء
و توم و جيرى

ههههههههههههههه

و مازلت ساعات بتابع حاجات من دى
"وش مكسوووف"

قطوف said...

يا سلام
فين أيام سينما الاطفال
ودنيا الاطفال
وعرستى
ويوم مع بابا
ياه الواحد راح بعيد بس ذكريات جميله شكرا الى انت فكرتنا بيها

Anonymous said...

wow ana kaman kont ba7ib atabe3 lady,edward kan fares a7lami yimken mishan heik ana b7ib il sho2r;)

Anonymous said...

oh,i forgot ramadan kareem

Mr_Tea said...

يااااااااه
الله عليك يا ابنى
على فكرة انا من اكبر و اهم عشاق الكارتون فى مصر
و رغم سخرية الحاقدين و السطحيين و العامة و الغوغاء إلا انى مصر على موقفى و هفضل أحب الكارتون لحد آخر يوم فى عمرى
اااه فكرتنى بالذى مضى

تحياتى

Unknown said...

شركة تنظيف بالاحساء
شركة مكافحة النمل الابيض بالاحساء
شركة مكافحة حشرات بالاحساء